अखबार नेपाल ट्रेन्डिङ

काठमाडौं: आइसिसी विश्वकप छनोटको सातौं स्थानको लागि नेपालले आज आयरल्यान्डविरुद्ध खेल्दैछ । यी दुईबीको खेल नेपाली समयानुसार दिउँसो १२:४५ बजे ताकाशिंगा स्पोर्ट्स क्लब हरारेमा हुनेछ ।

यस खेलको विजेता सातौं र पराजित हुने टोली आठौं स्थानमा रहेर विश्वकप छनोट अन्त्य गर्नेछन् । नेपालले ओडिआईमा आयरल्यान्डसँग पहिलो पटक खेल्न लागेको हो । नेपाल पहिलो भेटमै सानदार प्रदर्शनमा साथ आयरल्यान्डलाई हराउन चाहन्छ ।

सुपर सिक्समा पुग्न नसकेको आयरल्यान्ड नेपालमाथि सहज जित निकाल्ने सोचमा हुनेछ । समूह चरणमा आयरल्यान्डलाई ओमान र स्कटल्यान्डले पराजित गरेको थियो । नेपालले हालसम्म कुनैपनि खेलमा टेस्ट टोलीलाई हराएको छैन । नेपाल त्यो इतिहास बनाउने सोचमा हुनेछ ।

नेपालको रोहित पौडेल र आयरल्यान्डको एन्डी बालबर्नीले कप्तानी गर्नेछन् । नेपालले युएईविरुद्ध आसिफ शेख, कुशल मल्ल र ललित नारायण राजवंशीलाई विश्राम दिएको थियो । आजको खेलमा नेपालले अर्जुन साउदलाई बेन्चमा राख्दै आसिफ शेखलाई टोलीमा फर्काउन सक्छ । ज्ञानेन्द्र मल्ललाई भने नेपालले निरन्तरता दिने सम्भावना छ । अनुभवी खेलाडी हुँदा टेस्ट टोलीविरुद्ध निरन्तरता दिनसक्छ ।

नेपालको टोलीमा अन्य परिवर्तन गर्ने सम्भावना छैन । युएईविरुद्ध एक समय ६३-६ को अवस्थाबाट ७९ रनको इनिङ खेल्दै जित दिलाएका दीपेन्द्रसिंह ऐरीबाट नेपाल ठूलो अपेक्षा गर्दछ ।

नेपालका सबै ब्याटरले विश्वकप छनोटमा सर्ट बल र बाउन्सरमा संघर्ष गरेका छन् । आयरल्यान्डले सर्ट बलको प्रयास गर्न सक्छ । मार्क आदिर, क्रेग योंग र ब्यारी म्याकार्थी आयरल्यान्डका प्रमुख तीव्र गतिका बलर हुन् । यी तीन बलरबाट सर्ट बलमा नेपाली ब्याटर जोगिन सके राम्रो योगफल बनाउन सक्छन् ।

स्पिनर सन्दीप लामिछाने नेपालका प्रमुख बलर हुन् । उनीबाट ठूलो टोलीविरुद्ध नेपाल उत्कृष्ट प्रदर्शन चाहन्छ । तीव्र गतिका बलरमा करण केसीले नयाँ बलका साथ उच्च प्रदर्शन गर्दै आएका छन् । करणलाई गुलशन झा र सम्भव त किशोर महतोले साथ दिनेछन् । पार्टटाइममा दीपेन्द्र स्पिनरको रुपमा हुनेछन् ।

नेपाल समूह ‘ए’ बाट ४ खेलमा ३ मा हार र १ मा जित सहित चौथो स्थानमा रहेर बाहिरिएको थियो । नेपालले अमेरिकालाई ६ विकेटले हराएको थियो । जिम्बावेसँग ८ विकेट, वेस्टइन्डिजसँग १०१ र नेदरल्यान्ड्ससँग ७ विकेटले पराजित भएपछि सुपर सिक्समा पुग्न सकेको थिएन ।

उता आयरल्यान्ड पनि ४ खेलमा ३ मा हार र १ मा जितससहित चौथो स्थानमा रहेर समूह ‘बी’ बाट बाहिरिएको थियो । आयरल्यान्ड समूह चरणमा ओमानसँग ५ विकेट, स्कटल्यान्डसँग १ विकेट र श्रीलंकासँग १३३ रनले पराजित भएको थियो ।