अखबार नेपाल ट्रेन्डिङ

काठमाडौं: स्थानीय तहको निर्वाचनमा तालमेल गर्ने निर्णय गरेका सत्ता गठबन्धनका दलबीच महानगर र उपमहानगर बाँडफाँटमा अझै टुंगो लाग्न सकेको छैन ।

पटक-पटक छलफल गर्दा पनि सहमतिमा पुग्न नसकेको सत्तागठबन्धनको भागबण्डा टुंग्याउनका लागि आज फेरि बैठक बस्दैछ ।

आजको बैठकले महानगर र उपमहानगरको भागबण्डालाई अन्तिम रूप दिने बताइएको छ । बैठक ११ बजे प्रधानमन्त्रीनिवास बालुवाटारमा बस्दैछ ।

हिजो अबेरसम्म बसेको बैठकले महानगर र उपमहानगर बाँडफाँटको विषयमा सैद्धान्तिक सहमति भएको भनिएको छ ।

६ महानगरमध्ये तीनवटा कांग्रेसले राख्ने र माओवादी, नेकपा एस र जसपालाई एक-एक वटा दिने सहमति भएको बताइएको छ ।

त्यस्तै ११ मध्ये ७ वटा उपमहानगर कांग्रेसले राखेर बाँकी चारवटा बाँड्ने सहमति भएको छ ।

हिजो अबेरसम्म भएको छलफलमा जनकपुरधाम र नेपालगन्ज उपमहानगरमा कांग्रेस र जनता समाजवादी पार्टी (जसपा) बीच कुरा नमिलेपछि बैठक लम्बिएको हो ।

यी दुई महानगरमा दुवै पार्टीले दाबी गरेपछि कुरा मिल्न नसकेको हो ।