अखबार नेपाल ट्रेन्डिङ

एजेन्सी: रुसका राष्ट्रपति भ्लादिमिर पुटिनले अमेरिकाले नयाँ थप प्रतिबन्ध लगाए सम्बन्ध टुट्ने चेतावनी दिएका छन् ।

अमेरिकी राष्ट्रपति जो बाइडेनसँग भएको टेलिफोन वार्तामा पुटिनले युक्रेनसँग जोडेर अमेरिकाले नयाँ प्रतिबन्धहरु लगाइए पूर्ण रुपमा सम्बन्ध टुट्न सक्ने चेतावनी दिए ।

पुटिनले यस्ता प्रतिबन्धहरु अमेरिकाका लागि ठूलो भूल हुने समेत बताए । टेलिफोन वार्तामा बाइडेनले युक्रेनमाथि हुने जुनकुनै हस्तक्षेपलाई अमेरिका र उसका साझेदारले डटेर जबाफदिने बताएका थिए ।

बाइडेनले राष्ट्रपति पुटिनलाई कूटनीतिक समाधान खोज्न आग्रह गरेका थिए । रुसको आग्रहमा एक महिनामै दोस्रो पटक भएको यस्तो वार्ता झण्डै एक घण्टा चलेको थियो ।

युक्रेनी अधिकारीहरूले रुससँगको पूर्वी सीमा नजिक एक लाखभन्दा धेरै रुसी फौज तैनाथ भएको बताइ रहँदा तनाव मत्थर पार्ने पछिल्ला प्रयास भएका हुन् ।

अमेरिकाले पुटिनलाई यदि युक्रेनमाथि हमला गरिए ‘यसअघि कसैले नदेखे जस्तो’ प्रतिबन्ध लगाउने चेतावनी दिएको छ ।

सीमा नजिक उच्च सैनिक तैनाथीले पश्चिमी विश्वमा चासो बढाएको छ ।