अखबार नेपाल ट्रेन्डिङ

काठमाडौं: नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले तत्कालीन युद्धकालमा भएका कमीकमजोरीको छानबिन गरी सत्यतथ्य सार्वजनिक गर्ने बताएका छन् ।

विस्तृत शान्ति सम्झौता भएको १५औं वर्षका अवसरमा एक प्रेस वक्तव्य जारी गर्दै अध्यक्ष प्रचण्डले यस्तो बताएका हुन् ।

युद्धलाई शान्तिमा रुपान्तरण गर्ने काम सम्पन्न भएपनि सो अवधिमा घटेका घटनाको सत्य तथ्य छानविन गरी सार्वजनिक गर्न, पीडितहरुलाई परिपुरण र संक्रमणकालीन न्यायको मान्यतामा आधारित छानविनको प्रक्रिया टुङ्गोमा पुर्याई समाजमा मेलमिलाप कायम गर्ने काम बाँकी नै रहेको प्रचण्डले उल्लेख गरेका छन् ।

उनले यस मामिला राज्यकै भएकाले सबै गम्भीर रहेको पनि बताएका छन् । ‘यो मामिला सरकारको मात्रै नभइ राज्यकै मामिला हो’, उनले भनेका छन्, ‘यसर्थ यस विषयमा आजका दिनसम्म सत्ता पक्ष र प्रतिपक्ष एकमत छौँ । बाँकी काम पूरा गर्न पनि प्रतिवद्ध र एकतावद्ध हुने कुरामा कुनै द्विविधा छैन । हामी सम्वद्ध सबै पक्षलाई  विश्वास दिलाउन चाहन्छौँ ।’

उनले सहिद तथा वेपत्ता परिवार, घाइते, विस्थापित लगायतका पीडितहरुसँगको परामर्शमा अन्तर्राष्ट्रिय मापदण्डको पालना गरेर कानुन बनाइरहेको पनि बताएका छन् ।

नेपाली मौलिकतामा विधेयकलाई परिमार्जन गरी आगामी संसदीय अधिवेशनमा टुङ्गोमा पुर्‍याउने गरी काम भइरहेको पनि उनले बताएका छन् ।