अखबार नेपाल ट्रेन्डिङ

काठमाडौं: महानगरीय ट्राफिक प्रहरी महाशाखाले ट्राफिक व्यवस्थापन गर्न नयाँ योजना ल्याउन लागेको छ । मोटरसाइकलको पछाडि बस्नेले पनि हेल्मेट लगाउनुपर्ने गरी नयाँ नियम ल्याउन लागेको प्रहरीले जनाएको छ । मोटरसाइकलमा सवारी गर्ने दुबै जनाले राष्ट्रिय गुणस्तर चिन्ह प्राप्त हेल्मेट हुनुपर्ने व्यवस्था गर्न लागिएको हो ।

आज महाशाखामा पत्रकार सम्मेलन गर्दै ट्राफिक प्रहरी प्रमुख एसएसपी वसन्त पन्तले यो कुरा बताएका हुन् । नयाँ योजनामा अनलाइनमार्फत् जरिवानावापतको रकम तिर्न सकिने छ । यसबारे जानकारी दिँदै एसएसपी पन्तले भने, ‘चालकहरुलाई सहज होस् र ट्राफिक व्यवस्थापन गर्न सहज होस् भन्ने उदेश्यले अनलाइन पेमेन्टको योजना अघि ल्याइएको हो । अबको केही महिनामै यसले पूर्णता पाउँछ ।’

यसबाट चालकले लाइन बसेर बैंकमा भौचर भरेर रकम तिर्नु पर्ने समस्या समाधान हुने बताइएको छ । त्यसैगरी इ-चलानीमार्फत नियम उल्लङ्घन गर्ने चालकलाई चिट थमाइने पनि एसएसपी पन्तले बताए । यसमा प्रहरीले कागजको प्रयोज बिना कप्युटर प्रविधिमार्फत् चिट काट्ने छ । त्यस्तै ट्राफिक लाइट थप गर्न र व्यवस्थापन गर्ने, उपत्यकाका सम्पूर्ण ठाउँमा पिक एण्ड ड्रपको व्यवस्थापन गर्ने, करिडोरहरु सञ्चालन गर्ने योजना ट्राफिकको रहेको उनले बताए ।

साना सवारीलाई उपत्यकाबाट विस्थापन गर्न पनि ट्राफिकले भूमिका खेल्ने, पर्यटकीय क्षेत्रहरुमा भइकल फ्रि जोन बनाउने, भाडाका सवारीमा ड्रेस कोडको व्यवस्थापन गर्ने योजना ट्राफिकको रहेको बताइएको छ ।