अखबार नेपाल ट्रेन्डिङ

एजेन्सीः प्रिमियर लिग फुटबलमा पाँच खेलाडी परिवर्तन गर्न पाइने भएको छ । कोरोना महामारीका कारण गएको मार्चमा स्थगित भएको प्रिमियर लिग अर्को सातापछि सुरु हुँदा सहभागी क्लबले निर्धारित समयमा पाँच खेलाडी परिवर्तन गर्न पाउनेछन् ।

कोरोनाले लामो समय मैदान बाहिर रहेका खेलाडीलाई पुन: मैदान फर्कदा कठिन हुने भएको कारण प्रिमियर लिगले खेलाडी परिवर्तनको संख्यालाई बढाउने निर्णय गरेको हो । यस्तै लिग सुचारु पछि ७ देखि ९ खेलाडी बेन्चमा राख्न पाईनेछ ।

प्रिमियर लिग जुन १७ बाट सुचारु हुँदैछ । यस सिजन २० क्लबले ९२ खेल खेल्न बाँकी रहेको छ । यस सिजन लिभरपुल उपाधि नजिक रहेको छ । लिभरपुल दुई जितले च्याम्पियन बन्ने छ । यस सिजन लिभरपुल दोस्रो स्थानको म्यानचेस्टर सिटी भन्दा २५ अंकले अघि रहेको छ ।

विश्व फुटबल महासंघ फिफाले कोरोना महामारी पछि सुरुभएको फुटबलमा पाँच खेलाडी परिवर्तन गर्न पाउने नियम लिएर आएको छ । यो नयाँ नियमको पहिलो प्रयोग जारी जर्मन बुन्डेसलिगामा भएको थियो ।