अखबार नेपाल ट्रेन्डिङ

एजेन्सीः भारत प्रशासित जम्मु कस्मिरमा भारतीय सेनाले गरेको कारवाहीमा आतंकवादी संगठन हिजबुल मुजाहिदिनका शीर्ष नेताको मृत्यु भएको छ । हिज्बुल लडाकु रियाज नाइकु अर्का एक साथीसँग मारिएको बीबीसी हिन्दीले जनाएको छ ।

अवन्तीपुराको स्थानीयका अनुसार सेना, पारामिलिट्री र प्रहरीको संयुक्त कारवाहीमा आतंकवादीहरु मारिएका हुन् । उत्तर कस्मिरको कुपवाड जिल्लामा केहीदिन अगाडि आठ सुरक्षाबल मारिएपछि भारतीय पक्षले कारवाही अगाडि बढाएको थियो ।

४० वर्षका नाइकु स्थानीय हिज्बुल मुजाहिद्दीन समूहका अन्तिम जीवित नेता थिए । सन् २०१६ मा बुरहान वानी मारिएपछि नाइकुले हिज्बुल समूहको नेतृत्व गरिरहेका थिए । प्रहरी र सेनामाथि योजनावद्ध रुपमा हिज्बुल समूहले जम्मु कस्मिरमा आक्रमण गर्दै आएको छ । भारत सरकारले यसअघि नाइकुको मूल्य १२ लाख तोकेको थियो ।