अखबार नेपाल ट्रेन्डिङ

काठमाडौं: चीनको वुहान सहरबाट फैलिएको कोरोना भाइरसको महामारीबाट दुई लाखभन्दा बढी मानिसको मृत्यु भएको छ । विश्वका २ सय १० मुलुकमा फैलिएको कोरोना भाइरसको संक्रमणबाट मृत्यु हुनेको संख्या २ लाख ३ हजार २ सय ७२ पुगेको छ ।

पछिल्लो २४ घण्टामा संक्रमणबाट विश्वभर ६ हजार ६४ जनाको मृत्यु भएको छ भने ९० हजार १ सय ८ जना संक्रमित भएका छन् । कूल संख्या २९ लाख २० हजार नाघेको छ ।

कोरोना भाइरसको महामारीबाट सबैभन्दा बढी अमेरिका प्रभावित भएको छ । अमेरिकामा मृत्यु हुनेको संख्या ५४ हजार २ सय ४८ पुगेको छ । पछिल्लो २४ घण्टामा त्यहाँ ३५ हजार २ सय ९३ जना नयाँ संक्रमित थपिएका छन् । योसँगै संक्रमित हुने मानिसको संख्या ९ लाख ६० हजार ५ सय २५ पुगेको छ ।

अमेरिकामा संक्रमितमध्ये १ लाख १८ हजार १ सय ६२ जना उपचारपछि निको भएका छन् । उपचार गराइरहेका ७ लाख ८८ हजार १ सय १५ जनामध्ये १५ हजार १ सय १० जनाको अवस्था गम्भीर रहेको छ ।

कोरोना भाइरसको महामारीले इटालीमा एकै दिन ४ सय १५ जनाको मृत्यु भएको छ । शनिबार थप ४ सय १५ जनाको मृत्युभएपछि इटालीमा मृतकको संख्या २६ हजार ३ सय ८४ पुगेको छ । पछिल्लो २४ घण्टामा त्यहाँ २ हजार ३ सय ५७ जना नयाँ संक्रमित थपिएका छन् । योसँगै संक्रमित हुने मानिसको संख्या १ लाख ९५ हजार ३ सय ५१ पुगेको छ ।

स्पेनमा पछिल्लो २४ घण्टामा कोरोना भाइरसले ३ सय ७८ जनाको मृत्यु भएको छ भने ३ हजार ९ सय ९५ जना नयाँ संक्रमित थपिएका छन् । योसँगै कोरोना भाइरसको महामारीबाट स्पेनमा मृत्यु हुनेको संख्या २२ हजार ९ सय २ पुगेको छ भने २ लाख २३ हजार ७ सय ५९ जना संक्रमित भएका छन् । संक्रमित मध्ये ९५ हजार ७ सय ८ जना उपचारपछि निको भएका छन् ।

फ्रान्समा कोरोना भाइरसको संक्रमणले पछिल्लो २४ घण्टामा ३ सय ६९ जनाको मृत्यु भएको छ । योसँगै त्यहा मृतकको संख्या २२ हजार ६ सय १४ पुगेको छ । संक्रमितको संख्या १ लाख ६१ हजार ४ सय ८८ पुगेको छ ।

बेलायतमा कोरोना संक्रमणबाट मृत्यु हुनेको संख्या २० हजार नाघेको छ । एकैदिन अरु ८ सय १३ जनाको मृत्यु भएपछि मृतकको संख्या २० हजार ३ सय १९ पुगेको हो । कोरोना भाइरसका कारण युरोपियन मुलुकहरुमा १ लाख २० हजार १ सय १४ जना, उत्तर अमेरिकी मुलुकहरुमा ५८ हजार ५ सय ९१ जनाको मृत्यु भएको छ ।

यस्तै एसियाली मुलुकहरुमा १६ हजार ९ सय ३८, अफ्रिकी मुलुकहरुमा ७ हजार ३ सयभन्दा बढी र अष्ट्रेलिया सहित ओसिनिया मुलुकहरुमा ९८ जनाको मृत्यु भएको छ ।