अखबार नेपाल ट्रेन्डिङ

काठमाडौं: विश्वभर महामारीको रुपमा फैलिएको कोरोना भाइरसबाट बेलायतमा एक नेपालीको मृत्यु भएको छ । कोरोनाको महामारीबाट बेलायतमा एक पूर्वगोरखा सैनिकको मृत्यु भएको हो ।

बेलायतको साउथह्यारो बस्दै आएका ६६ वर्षीय लीलाबहादुर राईको मंगलबार नर्थविकपार्क अस्पतालमा मृत्यु भएको पारिवारिक स्रोतले जानकारी दिएको छ । परिवारका अनुसार मृतक पछिल्लो एक महिनादेखि नमोनियाबाट थलिएका थिए । झण्डै दुई दशक पहिले दुवै मृगौला प्रत्यारोपण गराएका उनी कोलेस्ट्रोल, घुंडा सुन्निने लगायत स्वास्थ्य समस्याबाट पनि पीडित थिए । पछिल्लो समय उनलाई रुघाखोकी पनि लागेको थियो ।

संखुवासभाबाट बसाइँ सरेर सुनसरीको इटहरी उपमहानगरपालिकामा पनि बसोबास गरिरहेका उनी सन् २००८ मा बेलायत गएका थिए । आर्मी नम्बर २११६०५८१ का राई सेकेण्ड गोरखा राइफल्समा १७ वर्षसम्म कार्यरत थिए । राई बेलायतमा श्रीमती र छोराबुहारीसहित बस्दै आएका थिए । कोरोना संक्रमित भएर निधन भएपछि अहिले उनको परिवारलाई नै ‘आइसोलेसन’ मा राखेर निगरानी गरिएको छ ।

परिवार नै आइसोलेसनमा रहेकाले आफन्तहरुलाई भेट्न दिइएको छैन । उता संखुवासभा समाज बेलायतले जिल्लाबासी र आफन्तलाई राईको परिवार आइसोलेसनमा रहेको जानकारी दिएको छ । उनीहरुको कोरोना रिपोर्ट नेगेटिभ आएर आइसोलेसनबाट निस्किएपछि मात्रै भेटघाट गर्न पाउने पाइने समाजले जनाएको छ ।

लण्डनस्थित नर्थ वीक अस्पतालमा उपचारका क्रममा ६ जना कोरोना संक्रमितको मृत्यु भइसकेको छ । जसमा एकजना पूर्व गोरखा सैनिक राई पनि हुन् । अस्पतालका अनुसार गम्भीर अवस्थामा ती ६ जनाको उपचारका क्रममा मृत्यु भएको हो । ती ६ जना बिरामीको मृत्युको पुष्टि अस्पतालले शुक्रबार गरेको हो ।

बेलायतमा ठूलो संख्यामा नेपाली समुदायको बसोबास छ । बेलायतमा कोरोना संक्रमितमध्ये ६५ जना मात्रै अहिलेसम्म उपचारपछि स्वस्थ भएर घर फर्किएका छन् ।