अखबार नेपाल ट्रेन्डिङ

चितवनः चितवनको राप्ती नगरपालिका भण्डारामा रहेको सशस्त्र प्रहरी बल नं ३ गढीमाई बाहिनी बागमती प्रदेशका ४२ प्रहरीमा एकैसाथ कोरोना सङ्क्रमण देखिएको छ ।

उनीहरुमध्ये दुई महिला र ४० पुरुष रहेको भरतपुर कोभिड–१९ प्रयोगशालाले जानकारी दिएको छ ।

यसअघि सोही बाहिनीका आठ जनामा कोरोना सङ्क्रमण देखिएपछि अन्यको परीक्षण गरिएको बाहिनी प्रमुख सशस्त्र प्रहरी नायब महानिरीक्षक मन्दिप श्रेष्ठले जानकारी दिए ।

६० जनाको नमूना सङ्कलन गरी पठाइएकामा ४२ जनामा सङ्क्रमण देखिएको उनले बताए । नौ जनालाई ज्वरो आएकामा ८ जना निको भएको उनले जानकारी दिए । बाहिनीमा ३०० भन्दा बढी सशस्त्र प्रहरी रहेका छन् ।यो बाहिनीले बागमती प्रदेशको राजधानीका तीन जिल्ला बाहेकका जिल्ला हेर्ने गर्दछ ।

सङ्क्रमण देखिएका प्रहरीलाई त्यहीँभित्र आइसोलेसन तयार गरी उपचार गरिने राप्ती नगरप्रमुख प्रभा बरालले जानकारी दिए । सोमबार राति अबेर कोभिड–१९ प्रयोगशालामा आएको नतिजा अनुसार ५० सङ्क्रमितमध्ये ४६ चितवनका हुन् ।

यसैबीच पोखराका १५ जनासहित गण्डकी प्रदेशमा थप २५ जनामा कोरोना भाइरसको संक्रमण पुष्टि भएको छ ।

सोमबार राति १७ जना र मंगलबार बिहान ८ जना गरी गण्डकी प्रदेशका २५ जना संक्रमित थपिएका हुन् । योसँगै गण्डकी प्रदेशमा कोरोना संक्रमितको संख्या १ हजार ७६४ पुगेको छ ।

गण्डकी प्रदेश स्वास्थ्य निर्देशनालयले दिएको जानकारी अनुसार मंगलबार बिहान कास्कीका ४, नवलपुरका २ र बागलुङका २ जनामा संक्रमण पुष्टि भएको छ ।संक्रमण पुष्टि भएका कास्कीका सबै पोखरा महानगरपालिकाका हुन् ।

संक्रमित हुनेमा पोखरा महानगरपालिकाका वडा नखुलेका वर्ष ५० र २५ का दुई महिला तथा महानगरको वडा नम्बर ६ का वर्ष २३ र २८ वर्षका २ पुरूष छन् । यस्तै बर्दघाट सुस्ता पूर्व नवलपुरको कावासोती नगरपालिका वडा नम्बर २ मा १४ वर्षीया वालिका र ३७ वर्षीया महिलामा संक्रमण देखिएको छ ।

बागलुङको बरेङ गाउँपालिका वडा नम्बर २ मा ६ वर्षीय बालक र २५ वर्षीया महिलामा संक्रमण पुष्टि भएको छ । सोमबार राति कास्कीका ११ जना, तनहुँका २ जना, नवलपुर, लमजुङ, बाग्लुङ र स्याङ्‌जाका एक एक जनामा संक्रमण पुष्टि भएको थियो । सोमबार रातिको विवरण अनुसार बागलुङ नगरपालिकाको वडा नखुलेका २६ वर्षीय एक पुरुषमा संक्रमण देखिएको प्रदेश स्वास्थ्य निर्देशनालयले जानकारी दिएको छ ।

नवलपुरको विनय त्रिवेणीको वडा नम्बर १ मा २८ वर्षीय पुरूष, लमजुङ दोर्दी गाउँपालिका वडा नम्बर १ का ३० वर्षीय र स्याङ्जाको पुतलीबजार नगरपालिकामा ६० वर्षीय एक पुरुषमा संक्रमण देखिएको थियो ।

तनहुँको ब्यास नगरपालिका वडा नम्बर १ का २३ र ३१ वर्षीय २ महिलामा पनि संक्रमण पुष्टि भएको छ । सोमबार राति संक्रमण पुष्टि भएका बाँकी ११ जना भने कास्कीका पोखरा महानगरपालिका हुन् ।