अखबार नेपाल ट्रेन्डिङ

काठमाडौं: पछिल्लो समय उपत्यका सहित देशभर कोरोना संक्रमितको संख्या ह्वात्तै बढेको छ ।

पछिल्लो समय काठमाडौं उपत्यकामा समयमै संक्रमितको पहिचान गर्न नसकेमा ‘कोरोना हटस्पोट’ बन्न सक्ने खतरा जनस्वास्थ्यविद्ले चेतावनी दिँदै आएका छन् ।

स्वास्थ्य तथा जनसंख्या मन्त्रालयको तथ्याङ्कले पनि सातवटा प्रदेशमध्ये बाग्मती प्रदेशमा सक्रिय संक्रमितको संख्या उच्च रहेको प्रष्ट पारेको छ ।

५ सयभन्दा बढी संक्रमित हुने ४ जिल्लामध्ये काठमाडौँ जिल्ला पनि एक हो । काठमाडौं उपत्यकामा सोमबारसम्म संक्रमितको संख्या १ हजार १ सय ८० पुगेको छ । काठमाडौंमा ९ सय ४८, ललितपुरमा १ सय ४३ र भक्तपुरमा ८९ जना संक्रमित पुष्टि भएको स्वास्थ्य मन्त्रालयले जनाएको छ ।

एक महिना अघिसम्म कोरोना संक्रमितमध्ये ९९.७ प्रतिशतमा कुनै लक्षण देखिएको थिएन । लक्षणसहितका संक्रमित बढेसँगै बागमती प्रदेशमा एक हप्तायता डिस्चार्ज हुनेभन्दा सक्रिय कोरोना संक्रमितको संख्या बढ्दै गएको हो ।

अन्य प्रदेशको तुलनामा बागमती प्रदेशमा सक्रिय कोरोना संक्रमित बढ्दा उपत्यकाका काठमाडौं, ललितपुर र भक्तपुर जिल्ला उच्च जोखिम रहेको तथ्याङ्कले देखाउँछ । उच्च जनघनत्व रहेको राजधानी काठमाडौँमा सक्रिय संक्रमितको संख्या बढ्दै जानु राम्रो संकेत नभएको जनस्वास्थ्यविद्हरूले बताउँदै आएका छन् ।

कोरोना संक्रमणबाट बच्नको लागि अनिवार्य रुपमा सही तरिकाले मास्क लगाउन, सामाजिक दुरी कायम गर्न, भीडमा ननिस्कन नेपाल सरकारले सबैलाई आग्रह गरेको छ ।