अखबार नेपाल ट्रेन्डिङ

काठमाडौं: नेपाली कांग्रेसका वरिष्ठ नेता रामचन्द्र पौडेलले नेतृत्व गर्दै आएको समूहले ७७ वटै जिल्लामा एकसाथ वडा अधिवेशन गर्न माग गरेको छ ।

पूर्वमहामन्त्री प्रकाशमान सिंहको निवास चाक्सीबारीमा शुक्रबार बसेको बैठकले भदौ १८ गते हुन गइरहेको वडा अधिवेशन ७७ वटै जिल्लामा गर्न माग गरेको हो ।

पार्टी सभापति शेरबहादुर देउवाले ३७ वटा जिल्लाको मात्र क्रियाशील सदस्यता विवरणमा हस्ताक्षर गरेर निर्वाचन समितिलाई दिएकाले सबै जिल्लामा वडा अधिवेशन नगर्न खोजेको त होइन भन्ने पौडेल समूहको आशंका छ ।

पौडेल समूहले ७७ वटै जिल्लामा एकसाथ वडा अधिवेशन सुरु गर्नुपर्ने भन्दै शुक्रबार नै प्रधानमन्त्रीसमेत रहेका सभापति शेरबहादुर देउवालाई भेट्ने भएको छ ।

पार्टी कार्यालय, सानेपामा रिले अनसनमा बसेका जिल्ला सभापतिको माग सम्बोधन गर्न पनि सभापतिको ध्यानाकषर्ण गराइने पौडेल समूहका एक नेताले बताए ।

चाक्सीबारी बैठकमा वरिष्ठ नेता पौडेल, महामन्त्री डा. शशांक कोइराला, पूर्वमहामन्त्री सिंह, कोषाध्यक्ष सीतादेवी यादव, पूर्वसहमहामन्त्रीद्वय अर्जुननरसिंह केसी, डा. रामशरण महत, नेताहरु बलबहादुर केसी, डा. शेखर कोइराला, दिलेन्द्रप्रसाद बडू र डा. मिनेन्द्र रिजाल सहभागी थिए ।