अखबार नेपाल ट्रेन्डिङ

काठमाडौं: इजरायलमा हमासको आक्रमणमा परि ज्यान गुमाएका १० जना नेपाली विद्यार्थीमध्ये ४ जना विद्यार्थीको शव शनिबार दिउँसो १:२५ बजे फ्लाइ दुबईको उडानबाट नेपाल पठाउने तयारी गरेको नेपाली राजदूत कान्ता रिजालले जानकारी दिएकी छिन् ।

प्यालेस्टाइनको सुन्नी-इस्लामिक कट्टरपन्थी सङ्घठन हमास र इजरायलबीचको युद्ध जारी छ । हमासले अचानक इजरायलमा गरेको आक्रमणमा परी आजसम्म इजरायलमा करिब १२ सय बढीले ज्यान गुमाएका छन् भने इजरायलले गरेको जवाफी हमलामा गाजा शहरमा पनि २५ सय बढी मानिस मारिएका छन् ।

नेपालबाट ‘लर्न एण्ड अर्न’ कार्यक्रम अन्तर्गत इजरेल पुगेका १० नेपालीको पनि नृशंस हत्या भएको छ । उक्त युद्धमा हजारौँ घाइते भएका छन् । कञ्चनपुरका विपिन जोशीसहित २५० जना हमासको बन्धकमा छन् । सोही आक्रमणमा परी नेपालबाट ‘लर्न एण्ड अर्न’ कार्यक्रम अन्तर्गत इजरेल पुगेका नेपाली विद्यार्थीहरुमध्ये निधन भएका चार जनाको शव इजरायल सरकारले इजरेलस्थित नेपाली दूतावासलाई बुझाएको छ ।

नेपाली राजदूत रिजाल र इजरेल सरकारका प्रतिनिधिहरूले मृतकहरुप्रति अन्तिम श्रद्धाञ्जली अर्पण गरेका छन् । हवाई तालिका अनुसार शव आइतबार बिहान काठमाडौँ आईपुग्नेछ साथै अन्य शव पहिचानको काम क्रमशः भइरहेको पनि राजदूत रिजालले बताइन् ।