अखबार नेपाल ट्रेन्डिङ

काठमाडौं: सोमबार राति १ बजे हृदयघातबाट निधन भएका संविधान सभा अध्यक्ष एवम् नेकपा एमालेका उपाध्यक्ष सुवासचन्द्र नेम्वाङको बिहीबार अन्तिम संस्कार गरिने भएको छ ।

उनको पार्थिव शरीर बुधबार पनि नेकपा एमालेको एमाले पार्टी कार्यालय च्यासलमा श्रद्धाञ्जलीका लागि राखिएको थियो । अब उनको शव अन्तिम संस्कारको प्रक्रियाका लागि बालुवाटारस्थित घरमा राखिएको छ । उनको पार्थिव शरीर अन्तिम श्रद्धाञ्जलिका लागि मंगलबारदेखि राखिएको थियो ।

नेम्बाङका दुवैजना छोराहरु अस्ट्रेलिया र बेलायतबाट आइसकेपछि बिहीबार अन्तिम संस्कार गर्न लागिएको हो । दुवै छोराले बुवाको पार्थिव शरीरमा च्यासलमै अन्तिम श्रद्धाञ्जली दिएका छन् । नेम्वाङका जेठा छोरा मिङ्सो बेलायतबाट बुधबार बिहान काठमाडौं उत्रिए । दुई साताअघि मात्रै अस्ट्रेलिया गएका कान्छा छोरा सुहाङ मंगलबार राति नै आइपुगेका थिए ।

अब नेम्वाङको निवासमा लिम्बु परम्परा अनुसार मुन्धुमी विधिबाट अन्तिम संस्कार अघि बढाइनेछ । नेकपा एमालेका उपमहासचिव प्रदीप ज्ञवालीले बिहीाबर बिहान ११ बजे नेम्वाङको हिन्दु र लिम्बू परम्परा अनुसार अन्त्येष्टि गरिने बताएका छन् ।

राजकीय सम्मानसाथ हुने नेम्वाङको अन्त्येष्टिका दिन बिहीबार नै सरकारको निर्णयानुसार शोक बिदा दिइएको छ । उता एमालेले आफ्ना उपाध्यक्ष नेम्वाङको निधनको शोकमा देशभरका पार्टी कार्यालयमा तीन झण्डा आधा झुकाएको छ ।

नेम्वाङ यसअघि पाँच पटक सभामुख र दुई पटक संविधानसभाका अध्यक्ष भएका थिए । उनी २०५१ को मनमोहन अधिकारी नेतृत्वको सरकारमा कानुन मन्त्री बनेका थिए ।