बारा-२ बाट उपेन्द्र पाँच हजार मतान्तरले विजयी
वि.सं.२०८० वैशाख १३ बुधवार ०८:३८
काठमाडौं: गठबन्धनबाट उम्मेदवार बनेका जनता समाजवादी पार्टीका अध्यक्ष उपेन्द्र यादवले बारा-२ बाट प्रतिनिधिसभामा पाँच हजार मतान्तरले विजयी भएका छन् ।
मतगणनाको नतिजा अनुसार २८ हजार ४१५ मत ल्याएर उनी विजयी भएका हुन् । उनका प्रमुख प्रतिस्पर्धी जनमत पार्टीका शिवचन्द्रप्रसाद कुशवाहा २३ हजार ३३४ मत ल्याए । यादव र कुशवाहाबीचको मतान्तर ५०८१ रहेको छ ।
एमालेका पुरुषोत्तम पौडेलले १० हजार २१६ मत प्राप्त गरे । रास्वपाबाट उठेका रमेशप्रसाद खरेलले ५ हजार पनि मत प्राप्त गरेनन् । उनी दुई हजार ८२९ मत पाएका छन् ।
मंसिर ४ को चुनावमा सप्तरी २ बाट जनमतका अध्यक्ष सीके राउतसँग १८ हजारभन्दा बढी मतान्तरले पराजित उपेन्द्र आफ्ना पार्टीका रामशहायप्रसाद यादवलाई उपराष्ट्रपति बनाएर उपनिर्वाचन मार्फत संसदमा आएका हुन् ।
बारामा उपेन्द्रलाई हराउन सीकेले पूर्वमन्त्रीसमेत रहेका माओवादी नेता कुशवाहालाई पार्टीमा भित्र्याएर चुनाव लडाएका थिए ।
वि.सं.२०८० वैशाख १३ बुधवार ०८:३८