अखबार नेपाल ट्रेन्डिङ

जनकपुर: इन्सपेक्टरबाट नेपाल प्रहरीको सेवा सुरु गरेका जनकपुरका गोविन्द कुमार साह २०७७ पुसमा एसएसपीमा बढुवा भए ।

उनीसँगै इन्सपेक्टरबाटै सेवा सुरु गरेका ब्याची नेपाल प्रहरीको भावी आईजीपीको लाइनमा छन् । तर उनले भने त्यो बाटोलाई पुर्णविराम लगाएर समाज सेवासँगै राजनीतिको बाटो समातेका छन् ।

१३ महिना कार्यकाल बाँकी छँदै साहले फागुनमा  सेवाबाट राजीनामा दिएपछि उनी यतिबेला आफ्नै गृह जिल्लामा ब्यस्त छन् ।

दुई दशक लामो प्रहरी सेवामा अनुभवी उनी अब समुदायमा खर्चिन चाहन्छन् । त्यसैले उनी यतिबेला गाँउकै बुढापाका, बालबालिका, महिला दिदीबहिनीको बृदी विकास कसरी गर्न सकिन्छ भन्ने ध्याउन्नमा देखिन्छन् ।

धनुषाको विदेह नगरपालिका–८ बफैमा साहकै पहलमा बुधवार निःशूल्क स्वास्थ्य शिविरको आयोजना गरे जस्मा ७ सय ५० जनाले  सम्पन्न निःशूल्क स्वास्थ्य परामर्श, औषधी तथा उपचार सेवा पाए ।

आफु नेपाल प्रहरीको एसएसपीसम्म पुगेको र अन्य व्यक्ति समेत राज्य सञ्चालनको प्रमुख तहमा पुगेपनि आफ्नो समाजको अवस्था जहाँको त्यही रहेको समयमा गरेको सानो सहयोगले पनि आफ्नो आगामी यात्रामा थप हौसला मिलेको साहले बताए ।

नेपाली कांग्रेस निकट मानिएका साह अब भने राजनीतिलाई समेत समाज सेवामा रुपान्तरण गर्ने योजनामा छन् । राजनीतिलाई पेशा बनाइरहेको आरोप लागि रहेको समयमा साहले भने आफैबाट परिवर्तनको संकल्प गरेर अघि बढेको दाबी गरे ।

त्यसैले साहले आगामी बैशाख ३० गते हुने स्थानीय तहको निर्वाचनमा विदेह नगरपालिकाको मेयरको उम्मेदवार बन्ने योजना बनाएका छन् ।

दुई दशक लामो प्रशासनिक अनुभवसँगै नयाँ गन्तव्य खोजिरहेको बताउने साहसँग आफ्नो स्थानीय तहको विकास गर्ने प्रष्ट आधार रहेको दाबी गरे ।

शिक्षा, स्वास्थ्यलाई पहिलो प्राथमिकता दिनुपर्ने बताउने साह कृषि पर्यटन लगायतका विकासका अनेकौ बाटाहरु हुँदा पनि त्यसको समुचित प्रयोगमा चुक्दा मुलुक विकास हुन नसकेको भन्दैं चिन्ता व्यक्त गरे ।