अखबार नेपाल ट्रेन्डिङ

काठमाडौं: नेपाली कांग्रेसको महाधिवेशनस्थल अहिले विभिन्न पदमा उम्मेद्वारी दिएका उम्मेद्वारहरुले आ-आफ्नै शैलीमा प्रचार प्रसार गरिरहेका छन् ।

उनीहरुले आफ्नो प्रचारलाई तीव्रैता दिएसँगै प्रचार-प्रसार गरिरहेकै सन्दर्भमा एक जना उम्मेदवारहले आफ्नो  प्रचार शैली फरक तरिका अपनाएका छन्  ।

यसरी फरक तरिका अपनाउने उम्मेदवार हुन उपसभापतिमा उम्मेदवारी दर्ता गराएका महेश आचार्य । उनले  चिठी लेखेर महाधिवेशन प्रतिनिधिसँग भोट मागेका छन् ।

आज महाधिवेशन प्रतिनिधिलाई सम्बोधन गर्दै उनले लेखेको पत्रमा मतदान गर्न जाँदा विचार रोज्न आग्रह गरेका हुन् ।

उनले पत्र लेख्दै मतदातासँग सोधेका छन्- ‘मतदान गर्न जाँदा विचार रोज्ने कि गुट रोज्ने ?’ यस्तै उनले भनेका छन्- ‘तपाईंको विवेकले उचित निर्णय गर्नेछ,’ ।

आचार्यले शनिबार उपसभापति पदमा उम्मेदवारी दिएका थिए ।

उनले स्वतन्त्र रूपमा उम्मेदवारी दिएका छन् । उनले पत्रमार्फत पार्टीभित्र मर्न थालेको नीति र विचारको राजनीतिलाई नयाँ जीवन प्रदान गर्न आफूले उम्मेदवारी दिएको समेत बताएका छन् ।

‘गुटबन्दीको धमिराले खाइराखेको संगठनको शक्तिलाई जोगाउनका लागि मेरो उम्मेदवारी हो । निष्ठाको राजनीति गर्ने साथीहरूको स्वाभिमानमाथि पैसा र बल प्रयोगको प्रहार रोक्नका लागि हो,’ उनले भनेका छन् ।