अखबार नेपाल ट्रेन्डिङ

काठमाडौं: कोरोनाभाइरस रोकथाम तथा नियन्त्रण उच्चस्तरीय समन्वय समितिले ‘लकडाउन’को स्वरुप परिवर्तन गर्ने भएको छ । समितिको शुक्रबार बसेको बैठकले जेठ ५ गतेपछि लकडाउनको स्वरुप परिवर्तन गरेर जाने तयारी गरेको हो ।

गत चैत ११ गतेदेखि जारी लकडाउनको समीक्षा गर्दै समितिले उच्च, मध्यम र न्यून जोखिम क्षेत्र छुट्याएर स्वरुप परिवर्तन गरिने समितिका सचिव नारायण विडारीले जानकारी दिए । त्यसैगरी, समितिले अध्ययन वा अन्य कामको सिलसिलामा जापान र हङकङमा बस्दै आएका तर लकडाउनका कारण नेपालमै फसेकाहरुलाई ‘चार्टर्ड फ्लाइट’बाट पठाउने निर्णय पनि गरेको छ ।

सचिव विडारीका अनुसार जापान जानबाट रोकिएका ६ सय र हङकङको ‘आइडी’प्राप्त व्यक्तिहरुलाई स्वास्थ्य परीक्षण तथा अध्यागमन प्रक्रिया पूरा गरी पठाइने छ । समितिले शुक्रबार स्वास्थ्य क्षेत्रका विभिन्न विज्ञहरुसँग छलफल पनि गरेको छ । छलफलमा विज्ञहरुले परीक्षण, कन्ट्रयाक्ट ट्रेसिङको दायरा बढाउनुपर्ने, क्‍वारेन्टाइनको व्यवस्थापन राम्रोसँग गर्नुपर्ने सुझाव दिएका छन् ।

आत्तिनुपर्ने अवस्थामा नभए पनि सचेत हुनुपर्ने, विदेशबाट आउनेहरुको सवालमा सम्बन्धित स्थानीय तहहरुमा क्‍वारेन्टाइनको उचित व्यवस्थान गरी ल्याउनुपर्ने विज्ञहरुले सुझाव दिएका छन् । चिकित्सा क्षेत्रका विज्ञहरुले सरकारलाई वैज्ञानिक ढंगबाट निर्णय गर्न र सम्बन्धित क्षेत्रका व्यक्तिहरुसँग पनि सल्लाह गर्न सुझाव दिएका छन् । विज्ञहरुका सुझावहरुमा पुनः छलफल गरी समितिले निर्णय गर्नेछ ।