अखबार नेपाल ट्रेन्डिङ

एजेन्सीः इंग्लिस प्रिमियर लिगमा लिभरपुलले आफ्नो अपराजित यात्रा कायम राखेको छ । शनिबार राती भएको खेलमा लिभरपुलले तालिकाको पुछारमा रहेको नर्विच सिटीलाई १–० को झिनो अन्तरले हराएको हो । लिभरपुलको जितमा साडियो मानोको दोस्रो हाफको गोल निर्णायक बन्यो ।

पहिलो हाफ गोलरहित बनेको खेलको ७८औं मिनेटमा मानेले गोल गरेका थिए । यसअघिका दुई खेलमा ह्यामस्ट्रिङ इन्ज्युरीका कारण खेल्न नसकेका माने ६०औं मिनेटमा एलेक्स आक्स्लेड च्याम्बरलिनको स्थानमा मैदान प्रवेश गरेका थिए । खेलमा ७२ प्रतिशत बल पोसेसन बनाएको लिभरपुलले नर्विचको पोस्टका कुल पाँच सट प्रहार गरेको थियो । जितसँगै लिभरपुलले शीर्ष स्थानमा २५ अंकको अग्रता लिएको छ । लिभरपुलले ७६ अंक बनाएको छ भने दोस्रो स्थानको म्यान्चेष्टर सिटीको ५१ अंक छ ।