अखबार नेपाल ट्रेन्डिङ

काठमाडौं: १३ औं दक्षिण एसियाली खेलकुद सागको दोस्रो दिन २४ स्वर्णको छिनोफानो हुँदा नेपालले १५ वटा स्वर्ण जितेको छ । नेपालले १५ स्वर्ण जित्ने क्रममा कराँते र तेक्वान्दोबाट ७-७ स्वर्ण र ट्रायथोलनमा १ स्वर्ण हात पारेको हो ।

यस्तै कराँतेमा २ र तेक्वान्दोमा १ रजत जितेको नेपालले तेक्वान्दोमा ३ र ट्रायथलनमा १ कास्य पदक पनि जितेको छ । यो संगै नेपाल सागको दोस्रो दिन १५ स्वर्ण सहित शिर्ष स्थानमा रहेको छ । नेपालले कराते तर्फ मात्र सात स्वर्ण जितेको छ । ९ प्रतिस्पर्धामा नेपालले सात स्वर्ण हात पारेको हो । अन्तिम स्वर्णका रुपमा अनु अधिकारीले पदक हात पारिन् । उनले श्रीलंकाकी डोनलाई आठ शुन्यको स्कोरमा हराइन् ।

कराँतेको कातामा नेपालका मण्डेकाजी श्रेष्ठले दोहोरो स्वर्ण जित्दै नयाँ कीर्तिमान बनाएका छन । पुरुषको एकल कातामा पहिलो भएका मण्डेले पुरुष टिम कातामा पनि स्वर्ण हात पारे । यसका साथै मण्डे एकै सागमा दुई स्वर्ण जित्ने पहिलो नेपाली खेलाडी बनेका छन् । नेपाली टिमले फाइनलमा श्रीलंकालाई हराएको थियो । नेपाली टिममा मण्डेसँगै महसुस मानन्धर र प्रविन महर्जनले नेपाललाई स्वर्ण दिलाए । करातेमा पुरुष एकल कातामा पनि मण्डेले पाकिस्तानी खेलाडीलाई हराँउदै स्वर्ण जितेका थिए ।

टिम कातामा नेपालका लागि निर्मला तामाङ, सरु कार्की, संगिता मगरले स्वर्ण चुमीन् । नेपालले पाकिस्तानलाई पछि पार्दै उपाधिजित्न सफल भयो । यस्तै करातेको पुरुष कुमुतेमा नेपालका लक्ष्मण तामाङले स्वर्ण जिते । लक्ष्मणले ५५ केजी तौल समूहमा बंगलादेशका मोहम्मद मस्तोफालाई पराजित गरे । यस्तै ८४ केजी माथिको तौल समुहमा विप्लबले पाकिस्तानी खेलाडीलाई हराउँदै स्वर्ण जिते । कुमुतेको ४५ केजी मुनीको तौल समुहमा कुशुम खड्काले बंगलादेशका मोउन्जेरा बोर्नालाई तीन दुईको अंकमा हरायो । महिला एकल कातमा चन्चला दनुवार र ८४ केजी तौल समुहमा दिवस श्रेष्ठ रजतमा सिमित बने ।