अखबार नेपाल ट्रेन्डिङ

काठमाडौं: भारतको गोवामा जारी महिला साफ च्याम्पियनसिपको फाइनल प्रवेशका लागि नेपालले बंगलादेशसँग खेल्दैछ । खेल दिउँसो ४:१५ बजे सुरु हुनेछ । दक्षिण एसियामा नेपालले अहिलेसम्म उपाधि जित्न सकेको छैन । तर पनि नेपालको छुट्टै साख छ । नेपाल साफ च्याम्पियनसिपको पछिल्लो ७ मध्ये एउटामा बाहेक सबैमा फाइनलमा पुगेको इतिहास छ ।

नेपालले पहिलो खेलमा भुटानसँग १-० को जित निकाल्यो । सो खेलमा प्रदर्शन फितलो रह्यो । दोस्रो खेलमा श्रीलंकासँग खेल्दा नेपालको प्रदर्शनमा सुधार देखियो । प्रशिक्षक नविन न्यौपानेले मौसमसँग घुलमिल हुन निकै गाह्रो परेको कारण भुटानसँग प्रदर्शन सोचेअनुरूप हुन नसकेको बताए । भुटानविरूद्धको फ्रन्ट लाइनमा खेलाडीले सोलो खेल्ने प्रयास गरेको र श्रीलंकाविरूद्ध केहि हदसम्म कम्बिनेसन खेल देखिनु टोलीको लागि सुखद रहेको उनले बताए ।

दक्षिण एसियामा पछिल्लो समय बंगलादेश नयाँ शक्तिको रूपमा उदाएको छ । पछिल्लो दुई संस्करणको उपाधि जित्दै बंगलादेशले साफमा प्रभुत्व जमाएको हो । तर बंगलादेश पनि ट्रान्जिसनल पिरियडबाट गुजरिरहेको छ । नयाँ खेलाडीहरूको बाहुल्यता रहेको छ । भारतसँगको ३-० को हार र माल्दिभ्सलाई ४-२ ले हराउँदाको प्रदर्शनले पनि बंगलादेशलाई तुलनात्मक रूपमा कमजोर मान्ने आधार हो ।

नेपाली टोली पनि यो पटक पूर्ण छैन । नियमित तथा टिमकी गोल मसिन सावित्रा भण्डारी (साम्बा) र सविता राना मगर नहुनु नेपालको लागि कमजोर पक्ष हो ।‌ यद्दपी उनीहरू बिना नेपालले दुई खेलमा निकालेको जितले टोलीमा आत्मविश्वास बढेको हुनुपर्दछ । रश्मिकुमारी घिसिङले श्रीलंकाविरूद्ध गोल गर्नु सकारात्मक पक्ष रहेको छ । नेपाल र बङ्गलादेशबीच अहिलेसम्म १२ खेल भएको छ । जहाँ नेपालले ५ खेल जितेको छ । बङ्गलादेशले २ खेल जित्दा ५ खेल बराबरीमा सकिएको थियो ।

साफमा नेपालको इतिहास

सन् २०१० देखि सुरू भएको साफ महिला च्याम्पियनसिपमा नेपालको दरिलो उपस्थिती रहँदै आएको छ । छ पटक फाइनलमा पुगेपनि नेपालले अहिलेसम्म उपाधि जित्न सकेको छैन् । सन् २०१० देखि २०१४ सम्मको पहिलो तीन संस्करणको फाइनलमा नेपाल भारतसँग पराजित हुन पुग्यो । सन् २०१४ को चौथो संस्करण साफ इतिहासमा नेपालले सबैभन्दा कमजोर प्रदर्शन गर्यो। नेपाल सेमिफाइनलमा नै पराजित हुँदै बाहिरियो ।

यसपछि सन् २०१९ मा नेपाल चौथो पटक भारतसँग फाइनलमा पराजित हुन पुग्यो । छैटौं संस्करणमा भने सँधैको तगारो भारतलाई नेपालले सेमिफाइनलमा माथ दियो । तर फाइनलमा बङ्गलादेश बाधक बनिदियो । दशरथ रङ्गशालामा भएको सो फाइनलमा नेपाल ३-१ ले पराजित हुँदा पाँचौ पटक उपाधि जित्न चुक्यो । यसपछि गत संस्करण अर्थात् २०२४ को सातौं संस्करणमा पनि नेपालले सेमिफाइनलमा भारतलाई हरायो । तर विडम्बना फेरि नेपाल बङ्गलादेशसँग २-१ ले चुक्यो ।