अखबार नेपाल ट्रेन्डिङ

काठमाडौं: नेपाली राष्ट्रिय पुरुष क्रिकेट टोलीले त्रिकोणात्मक टि-२०आई सिरिजको तेस्रो खेलमा घरेलु टोली स्कटल्याण्डलाई दुई विकेटले हराउँदै सिरिजमा पहिलो जित निकालेको छ । मंगलबार सम्पन्न खेलको जितसँगै सिरिजमा स्कटल्यान्ड, नेपाल र नेदरल्यान्ड्सले समान दुई अंक पुर्‍याएका छन् । नेटरनरेटमा स्कटल्यान्ड शीर्ष र नेपाल दोस्रो स्थानमा छ ।

स्कटल्यान्डले दिएको ९८ रनको सामान्य लक्ष्य पूरा गर्न नेपाललाई १९.५ ओभरसम्म कुर्नुपर्‍यो । अन्तिम ओभरमा नेपाललाई जितका लागि ४ रन चाहिएको थियो । सफायान शरिफको सुरुआती तीन बलमा करणले दुई र किरण ठगुन्नाले एक रन लिए । तर, चौथो बलमा किरण क्याच आउट भए । योसँगै खेल पुन: सुपर ओभरतर्फ जाने देखिएको थियो । तर, पाँचौं बलमा सन्दीप लामिछानेले एक रन लिँदै नेपाललाई पहिलो जित दिलाए ।

नेपालका ओपनर कुशल भुर्तेलले सर्वाधिक ३० रन बनाए । ३५ बल खेलेका उनले ४ चौका प्रहार गरे । दीपेन्द्रसिंह ऐरीले २१ बलमा १४ रन बनाए । बसीर अहमद १३ र किरण १० रनमा पभिलियन फर्किए । स्कटल्यान्डका शरिफ र माइकल लीस्कले समान २ विकेट लिए ।

टस हारेर पहिला ब्याटिङ थालेको स्कटल्यान्डले १९.४ ओभरमा सबै विकेट गुमाउँदै ९७ रन बनायो । स्कटल्यान्डका लीस्कले सर्वाधिक ४६ रन बनाए । ४६ बल खेलेका उनले चार चौका र एक छक्का प्रहार गरे । म्याथ्यु क्रस १५ र ब्रान्डन म्याकमुलनले १० रन बनाए । अन्यले भने प्रभावकारी इनिङ्स खेल्न सकेनन् । नेपालका सन्दीप लामिछानेले सर्वाधिक चार विकेट लिए । चार ओभर बलिङ गरेका उनले एक मेडनसहित ११ रन खर्चिए । दीपेन्द्रसिंह ऐरी र करण केसीले समान दुई/दुई विकेट लिए । एक विकेट ललितनारायण राजवंशीको नाममा रह्यो ।