अखबार नेपाल ट्रेन्डिङ

काठमाडौं: कप्तान पूजा महतोको दमदार प्रदर्शनसँगै नेपालले आइसिसी यु-१९ महिला टी-२० विश्वकप एसिया छनोटमा कुवेतविरुद्ध विशाल जित हात पारेको छ ।

नेपालले दिएको २१४ रनको लक्ष्य पछ्याएको कुवेतले १३ ओभरमा सबै विकेट गुमाउँदै ४८ रन मात्रै बनाउन सक्यो । जितसँगै नेपालले १६५ विशाल रनले प्रतियोगितामा चौथो जित निकालेकोह हो । नेपालले थाइल्यान्डलाई ६७ र १०६ रनले पराजित गरेको थियो । यस्तै, कुवेतलाई १०८ रनले पाखा लगाए पनि युएईसँग १३ रनले पराजित हुन पुगेको थियो ।

नेपाललाई विश्वकपमा पुग्न बुधबार हुने अन्तिम खेलमा युएईविरुद्ध फराकिलो जितको आवश्यक पर्नेछ । युएई अपराजित रहँदै चार खेलबाट ८ अंक जोड्दै शीर्ष स्थानमा छ । एक खेल बढी खेलेको नेपालको ८ अंक छ । यद्यपि, युएईले थाइल्यान्ड र नेपालसँग खेल्न बाँकी छ । युएई नेटरन रेटमा पनि नेपालभन्दा बलियो स्थितिमा छ । युएईको नेटरनरेट ४.७१२ छ भने नेपालको ४.३३० मात्रै छ ।

नेपालको जितमा कप्तान पूजाले अविजित १३० रन बनाइन् भने बलिङमा सर्वाधिक पाँच विकेट लिइन् । युएइकी ओपनर जेफा जिलिनीबाहेक अन्यले दोहोरो अंकमा रन बटुल्न सकेनन् । ४२ बल खेलेकी उनले ७ चौकासहित ३६ रन बनाइन् । कुवेतका ७ ब्याटर शून्य रनमै पेभिलियन फर्किए । नेपालले ७ रन अतिरिक्त दिएको थियो । पूजाले नवौं ओभरमा ४ विकेट लिएकी थिइन् । पहिलो बलमा रेलिन मारियालाई उनले एलबिडब्यु आउट बनाइन् ।

दोस्रो बलमा अमिषा रामलाई बोल्ड गरेकी थिइन् । तर, उनी ह्याट्रिक विकेट लिन भने चुकिन । तेस्रो बलमा सेरेना साइमनले डट खेलिन् । चौथो बलमा सेरेनालाई पुजाले बोल्ड गरिन् । पाँचौं बलमा सारा जस्भीलाई बोल्ड गरिन् । यद्यपि, अन्तिम बलमा जिनिया अफरोजले डट खेल्दै उनलाई पुन: ह्याट्रिक लिन रोकिन् । त्यसभन्दा पहिला उनले आयुषा इकवालको विकेट लिएकी थिइन् । रचनाकुमारी चौधरी र सीमा केसीको नाममा समान दुई विकेट रह्यो ।

त्यसअघि अजमानमा टस जितेर पहिला ब्याटिङ थालेको नेपालले निर्धारित २० ओभरमा दुई विकेट गुमाउँदै २१३ रन बनाएको हो । नेपाली टोलीका ओपनर साना प्रभिन र सावित्री धामी कृजमा जम्न सकेनन् । तर, कप्तान पूजा र उपकप्तान सोनी पाख्रिनले १५७ रनको साझेदारी गर्दै नेपाललाई बलियो स्थितिमा पुर्‍याएकी हुन् ।

पूजाले प्रतियोगितामै पहिलो शतक प्रहार गरिन् । ६९ बल खेलेकी उनले १७ चौकासहित १३० रनको अविजित इनिङ्स खेलिन् । यस्तै, सोनी अर्धशतक बनाउन ७ रनले चुकिन् । ३३ बल खेलेकी उनले दुई चौकासहित अविजित ४३ रन बनाइन् ।