अखबार नेपाल ट्रेन्डिङ

काठमाडौं: नेपाल ओमानमा जारी एसीसी प्रिमियर कपको सेमिफाइनलबाटै बाहिरिएको छ । आज भएको खेलमा नेपाल यूएईसँग ६ विकेटले पराजित हुँदै बाहिरिएको हो ।

पराजयसँगै नेपालले आगामी वर्ष आयोजना हुने एसीसी एसिया कप खेल्ने सम्भावना पनि समाप्त भएको छ । टस हारेर नेपालले पहिला ब्याटिङको निम्तो पाएको थियो । जितका लागि नेपालले युएईलाई १२० रनको लक्ष्य दिएको थियो । नेपालले निर्धारित २० ओभरमा ९ विकेट गुमाएर ११९ रन जोडेको थियो ।

नेपालका ८ ब्याट्सम्यानले दोहोरो अंक छुन सकेनन् । सन्दीप जोराले सर्वाधिक ५० रन जोडे । गुल्सन झाले २० र करन केसीले १७ रन बनाए । इनिङ्सको पहिलो बलमै कुशल भुर्तेल गोल्डेन डकआउट भएका थिए । रोहित पौडेलले १८ बलमा ५ रन जोडे भने आसिफ शेखले ८ रन बनाए । कुशल मल्ल ३ र दीपेन्द्रसिंह ऐरी ५ रन जोडेर आउट भए ।

यूएईका जुनैद खान, अलि नासिर र बासिल हमिदले २/२ तथा आयान अफजल खान, मुहम्मद फारुक र ओमिद सफि रहमानले एक एक विकेट लिए । यूएईले १७.२ ओभरमा ४ विकेट गुमाएर लक्ष्य पुरा गर्‍यो । ओपनर एलिसान सराफुले सर्वाधिक ५५ रन बनाए । विष्णु सुकुमारनले २८, आसिफ खानले १० र सेयद हैदरले १४ रन बनाए । १२ रन जोड्दा पहिलो विकेट गुमाएको यूएईले दोस्रो विकेटका लागि ४२ रनको साझेदारी गरेको थियो ।

नेपालका लागि गुल्सन झाले २ तथा ललित नारायण राजवंशी र सोमपाल कामीले एक एक विकेट लिए । प्रतियोगिताको विजेता एसिया कपका लागि छनोट हुनेछ । नेपालले समूहगत चरणका सबै ४ खेल जितेर विजेताका रूपमा सेमिफाइनलमा स्थान बनाएको थियो ।