अखबार नेपाल ट्रेन्डिङ

काठमाडौं: आईसीसी टी-२० विश्वकप एसिया क्षेत्र छनोटका लागि नेपाल क्रिकेट संघ (क्यान)ले शनिबार १५ सदस्यीय टोली सहित नेपाली राष्ट्रिय क्रिकेट टोलीको घोषणा गरेको छ ।

रोहित कुमार पौडेलको कप्तानीमा क्यानले घोषणा गरेको टोलीमा लेग स्पिनर सन्दीप लामिछाने रहेका छन् । घरेलु मैदानमा भएको त्रिकोणात्मक क्रिकेट सिरिजमा सन्दीप टोलीमा थिएनन् । यस्तै विकेट किपर ब्याट्सम्यान विनोद भण्डारी पनि टोलीमा अटाएका छन् ।

टियु र मुलपानी क्रिकेट मैदानमा हुने छनोट यहिँ कात्तिक १३ देखि १९ गतेसम्म आयोजना हुँदैछ । नेपाल रहेको समूह ‘ए’ मा सिंगापुर, ओमान र मलेसिया छन् । समूह ‘बी’ मा युएई, बहराइन, हङकङ र कुवेत छन् । समूह ‘ए’ का सबै खेल कीर्तिपुरस्थित त्रिवि मैदानमा हुनेछ ।

समूह ‘बी’ का सबै खेल मूलपानी क्रिकेट मैदानमा हुनेछ । नेपालले पहिलो खेल सोमबार सिंगापुरसँग खेल्नेछ । फाइनल कात्तिक २० गते हुनेछ । फाइनल पुग्ने अन्तिम दुई टोली सन् २०२४ मा अमेरिका र वेस्ट इन्डिजमा हुने विश्वकपका लागि छनोट हुनेछन् । नेपालले सन् २०१४ मा टी-२० विश्वकपमा डेब्यु गरेको थियो । त्यसयता भने छनोट हुन सकेको थिएन । यो पटक भने नेपाल उपाधिको प्रमुख दाबेदारको रुपमा हेरिएको छ ।