अखबार नेपाल ट्रेन्डिङ

काठमाडौं: एसियाली फुटबल महासंघ (एएफसी)को आयोजनामा हुने एएफसी कप फुटबल प्रतियोगिता अन्तर्गत नेपालको मछिन्द्र फुटबल क्लबले भुटानको पारो एफसी क्लबसँग भिड्दैछ ।

त्रिपुरेश्वरस्थित दशरथ रङ्गशालामा हुने खेलमा दुवै टोली तयारी अवस्थामा रहेको पत्रकार सम्मेलनमा जानकारी दिएको छ । मछिन्द्र क्लबका प्रशिक्षक किशोर केसीले सबै प्रशिक्षण सकेर खेलका लागि आफ्नो टोली तयारी अवस्थामा रहको बताए । सहिद स्मारक ‘ए’ डिभिजन लिगको उपविजेता बनेको मछिन्द्रले एएफसी कप खेल्ने अवसर पाएको हो ।

लिगमा च्यापियन बनेको चर्च ब्वाइज क्लबसँग एएफसी क्लबको लाइसेन्स नहुँदा उपविजेता बनेको मछिन्द्रले मौका पाएको हो । यता भुटानको पारो एएफसी क्लब लिगमा पहिलो स्थान हासिल गर्दै प्रतियोगितामा सहभागिता जनाएको हो ।

पारो एफसीका प्रशिक्षक पुष्पलाल शर्माले भुटानमा लिग भइरहेकाले आफ्नो टोलीको तयारी राम्रो रहेको बताए । उनले मछिन्द्र क्लबमा राष्ट्रिय खेलाडीसमेत समावेश रहेकाले आफूहरूले मछिन्द्र क्लबलाई बलियो प्रतिद्वन्द्वीको रूपमा लिएको बताए ।

मछिन्द्र र पारोबीचको खेलको विजेताले एएफसी कपको दोस्रो चरणमा भारतको मोहन बगान क्लबसँग खेल्नेछ । उक्त खेल यही साउन ३१ गते हुनेछ । मछिन्द्रले गत वर्ष पनि एएफसी कपको प्रारम्भिक चरण खेलेको थियो । उक्त खेलमा मछिन्द्र श्रीलंकन क्लब ब्लू स्टारसँग घरेलु मैदानमै पराजित भएको थियो ।