२२,४७५ विद्यार्थीले ल्याए उत्कृष्ट जीपीए
वि.सं.२०८० असार २१ बिहीवार १७:५६
काठमाडौं: राष्ट्रिय परीक्षा बोर्डले आज २०७९ सालमा लिइएको माध्यामिक शिक्षा परीक्षा (एसईई) परीक्षाको नतिजा सार्वजनिक गरेको छ ।
परीक्षामा २२ हजार ४७५ जना विद्यार्थीले ३.६० देखि ४.० जीपीए ल्याएको बोर्डका अध्यक्ष डा. महाश्रम शर्माले जानकारी दिए । ०.८ देखि १.२ सम्म जीपीए ल्याउने २ हजार २ सय विद्यार्थी रहेका छन् । यस्तै, ३८ हजार ७७० विद्यार्थीले १.२ देखि १.६ सम्म जीपीए ल्याएका छन् । १.६ देखि २ सम्म जीपीए ल्याउने ८८ हजार ४४७, र २ देखि २.४ सम्म जीपीए ल्याउने विद्यार्थी संख्या १ लाख दुई हजार २९३ जना रहेका छन् ।
यसैगरी २.४ देखि २.८ सम्म जीपीए ल्याउने विद्यार्थी संख्या ८९ हजार ३३१ जना रहेको छ । ७२ हजार ३६२ जनाले २.८ देखि ३.२ सम्म जीपीए ल्याएका छन् भने ५५ हजार ६९ जनाले ३.२ देखि ३.६ सम्म जीपीए प्राप्त गरेको परीक्षा बोर्डले जनाएको छ ।
यसपटक अंग्रेजी, गणित र विज्ञानमा स्तरीकृत प्रश्न सोधिएको थियो । गत चैत्र १७ गतेदेखि सञ्चालन भएको परीक्षामा ४ लाख ८५ हजार ३९६ विद्यार्थी सहभागी थिए ।
वि.सं.२०८० असार २१ बिहीवार १७:५६