अखबार नेपाल ट्रेन्डिङ

काठमाडौं: जारी फिफा विश्वकप २०२६ को सेमिफाइनलमा इङ्ल्यान्डलाई रोमाञ्चक तथा सनसनीपूर्ण २-१ गोल अन्तरले पराजित गरेपछि फक्ल्यान्ड टापुको दाबीसहितको ब्यानर प्रदर्शन गरेको भन्दै साविक विजेता अर्जेन्टिना विवादमा तानिएको छ । ब्यानरकै कारण अर्जेन्टिना फिफाको कारबाहीमा पर्ने सम्भावना बढेको छ ।

अमेरिकाको एटलान्टामा भएको रोमाञ्चक तथा सनसनीपूर्ण खेलमा थोमस टुचेलको इङ्ल्यान्डलाई हराउँदै अर्जेन्टिना फाइनल पुगेको हो । तर, खेल सकिए लगत्तै अर्जेन्टिनी खेलाडीले मैदानमा फाल्कल्यान्ड अर्जेन्टिनाको हो लेखिएको ब्यानर बोकेर जितको खुसीयाली मनाएका थिए । दक्षिण–पश्चिम एट्लान्टिक महासागरमा रहेको बेलायती विदेशी क्षेत्र फाल्कल्यान्ड टापुलाई लिएर बेलायत र अर्जेन्टिनाबीच लामो समयदेखि सार्वभौमसत्ताको विवाद छ ।

सन् १९८२ मा यही टापुलाई लिएर दुई देशबीच ७४ दिन लामो युद्ध भएको थियो, जसमा ६ सय ५५ अर्जेन्टिनी र २ सय ५५ बेलायती सैनिकले ज्यान गुमाएका थिए । फिफाले खेलकुदमा राजनीतिक सन्देश र उच्छृङ्खल गतिविधिलाई पूर्ण प्रतिबन्ध लगाएको छ ।

यसअघि सन् २०१४ मा स्लोभेनियाविरुद्धको मैत्रीपूर्ण खेलअघि यस्तै ब्यानर प्रदर्शन गर्दा फिफाले अर्जेन्टिनी फुटबल संघलाई २० हजार पाउन्ड जरिवाना गरेको थियो । राजनीतिक तनावका कारण यो खेलमा सुरक्षा व्यवस्था कडा पारिएको थियो । खेलअघि अर्जेन्टिनाका प्रशिक्षक लियोनल स्कालोनीले फुटबल र राजनीतिलाई मिसाउन नहुने बताएका थिए । यद्यपि, जितपछि अर्जेन्टिनाकी उपराष्ट्रपति भिक्टोरिया भिलाएलले सामाजिक सञ्जाल एक्समा ‘यो सामान्य खेल मात्र थिएन’ भन्दै ब्यानर प्रदर्शनको बचाउ गरेकी छन् ।