अखबार नेपाल ट्रेन्डिङ

काठमाडौं: ट्रायलमा फेल र अनुपस्थित भएका १३ सय जनालाई यातायात व्यवस्था कार्यालय एकान्तकुना ललितपरले लाइसेन्स दिएको खुलेको छ । सवारी चालक अनुमतिपत्र बागमती एकान्तकुना कार्यालयका तत्कालिन कार्यालय प्रमुख उपसचिव आनन्दकेशरी पोखरेल सहित ३८ जनाको मिलोमतोमा ट्रायलमा फेल भएकालाई लाइसेन्स दिएको भन्दै अख्तियार दुरुपयोग अनुसन्धान आयोगले आइतबार विशेष अदालतमा मुद्दा दायर गरेको छ ।

खरेलविरुद्ध ८ लाख ५९ हजार विगो कायम गर्दै विगोको दोब्बर जरिवानाको माग दाबी गरिएको छ । सबै प्रतिबादीलाई कसुरको मात्रा अनुसार फरक फरक विगो र सजायको मागसहित अभियोगपत्र दर्ता भएको छ । प्रयोगात्मक परीक्षामा फेल भएका १ हजार २ सय ८४ जनालाई पास गराउने पोखरेलसहित तीन उपसचिव, इन्जिनियर, डीएसपी सहित यातायात कर्मचारीलाई प्रतिवादी बनाएको छ ।

२०६९ वैशाख, जेष्ठ र आषाढ महिनाभित्र प्रयोगात्मक परीक्षामा भएको फेरबदलको सम्बन्धमा परेका उजूरीको आधारमा अख्तियारले अनुसन्धान गरेको हो । प्रयोगात्मक परीक्षा (ट्रायल) मा फेल/अनुपस्थित भएकालाई पास जनाई निर्णय गरेको गरेको पाइएको छ । आरोपीहरुले ट्रायलको नतिजामा फेरबदल गरी सवारी चालक अनुमतिपत्र(लाइसेन्स) जारी गरेको अख्तियारका प्रवक्ता प्रदीपकुमार कोइरालाले जानकारी दिनुभएको छ ।

नयाँ सवारी चालक अनुमतिपत्रको कार्यालयमा रहेको अभिलेख लगायतका सरकारी कागजात नोक्सान गरेको र उक्त जारी गरिएका सवारी चालक अनुमतिपत्रको लिनुपर्ने राजश्वसमेत नलिएर सरकारी सम्पत्ति हिनामिना गरेको पुष्टि भएको अख्तियारले दाबी गरेको छ ।