अखबार नेपाल ट्रेन्डिङ

काठमाडौं: राष्ट्रिय स्वतन्त्र पार्टीका सभापति रवि लामिछानेले जग्गा कीर्ते, नागरिकता कीर्ते गर्ने, सहकारीका ठगहरुलाई कारबाही गर्न माग गरेका छन् । प्रतिनिधिसभाको बैठकमा बोल्दै उनले काम गर्न पुराना दलहरुलाई नयाँ दलले कहीँ नरोकेको स्पष्ट पारे ।

बुधबार बसेको प्रतिनिधिसभाको बैठकमा रास्वपाको तर्फबाट आफ्नो भनाइ राख्ने क्रममा लामिछानेले सत्तारूढ गठबन्धनले सबै काम थाहा पाएर पनि काम गर्न नसकेको भन्दै प्रश्न गरेका छन् । ‘हामीले यहाँ सत्तारुढ सांसदहरूका कुरा सुन्यौँ । सरकारका मान्छेलाई सबै कुरा थाहा रहेछ त । सबै थाहा भएर पनि काम नगरेको चाहिँ किन ?’, उनले भने, ‘इतिवृत्तान्त थाहा भएर पनि किन काम नगरेको ? हामी नयाँ दलले रोकेको हो त ? त्यस्तो हो भने त्यो पनि बाटो फुकाउँला ।’

उनले सरकारी जग्गा किर्ते गर्ने मान्छे सत्तारुढ दलकै हुँदा पनि कारबाही नगरेको भन्दै व्यंग्य गरे । ‘सरकारी जग्गा किर्ते गर्ने मान्छे आफ्नै वरिपरी पो छन् कि एक पटक हेर्नुहोला’, उनले भने, ‘सहकारीमा ठगी गर्नेलाई कारबाही के ले रोकेको छ ? नागरिकता किर्ते गर्नेलाई कारबाही रोक्न कसले रोकेको छ ?’ लामिछानेले एकै कार्यकाल चुनाव हारेका मान्छेलाई त्यही कार्यकालमा राष्ट्रियसभामा लैजाने काम गरेर गठबन्धनले गलत कामलाई प्रश्रय दिएको बताएका छन् ।

लामिछानेले केही मन्त्रीहरू भ्रष्टाचारमा मुछिएको प्रकरणमा अधिकारप्राप्त निकायले बयानका लागि बोलाउँदा किन नगएको भन्दै कटाक्ष गरे । ‘गाडी नपाएर नगएको भए हामी गाडी उपलब्ध गराइदिउँला’, उनले भने, ‘होइन भने बयानमा बोलाउँदा जान के ले रोकेको हो ?’