अखबार नेपाल ट्रेन्डिङ

काठमाडौं: नेकपा एकीकृत समाजवादीका अध्यक्ष माधव कुमार नेपालले केन्द्रीय कमिटी बैठकमा आफ्नो राजनीतिक प्रतिवेदन पेस गरेका छन् ।

आजबाट सुरु भएको केन्द्रीय कमिटीमा ३९ पृष्ठ लामो प्रतिवेदन पेस गर्दै अध्यक्ष नेपालले पछिल्लो गठबन्धन, पार्टी विद्रोहको महत्व, पार्टीमा बढ्दै गएको निराशा र वाम एकता लगायतका विषयमा चर्चा गरेका छन् ।

अध्यक्ष नेपालले तत्काल वाम एकता असम्भव रहेको पनि प्रतिवेदनमा उल्लेख गरेका छन् । ‘नेकपा (माओवादी केन्द्र) र जसपा लगायतका पार्टीहरूसँग एकता वार्ता पनि चलाएका थियौँ । यस दौरान व्यवहारबाट के स्पष्ट भयो भने अहिले तत्काल कम्युनिष्ट पार्टीहरूबीचको एकता वा वाम एकता सम्भव छैन,’ उनले भने, ‘पार्टी एकता हुनका निम्ति पार्टीको नाम, मार्गदर्शक सिद्धान्त, सङ्गठनात्मक सिद्धान्त, कार्यक्रम र कार्यदिशाजस्ता मूलभूत विषयमा एकरूपता हुनुपर्दछ ।’

साझा कार्यक्रम मोर्चाबाट गरिन्छ भने पार्टीका आफ्ना कार्यक्रम स्वतन्त्र रूपमा चलिरहने उनले बताएका छन् । ‘समाजवादी मोर्चामा रहँदा पार्टी कमजोर हुन्छ भन्ने होइन । मोर्चामा रहनु भनेको त्यसैमा विलय हुने भन्ने होइन । मोर्चामा रहँदैमा पार्टीको स्वतन्त्र अस्तित्व समाप्त हुने होइन,’ उनले भनेका छन्, ‘मोर्चामा रहेको बेलामा पनि पार्टीको आफ्नो स्वतन्त्र अस्तित्व रहिरहन्छ र पार्टीले आफ्ना कार्यक्रम र क्रियाकलाप स्वतन्त्र रूपमा सञ्चालन गरिरहन्छ ।’