अखबार नेपाल ट्रेन्डिङ

काठमाडौं: नेकपा माओवादी केन्द्रले संघीय मामिला तथा सामान्य प्रशासन मन्त्री अमनलाल मोदीलाई फिर्ता बोलाउने निर्णय गरेको छ ।

प्रधानमन्त्री निवास बालुवाटारमा आज बसेको माओवादी केन्द्रको पदाधिकारी बैठकले मोदीलाई फिर्ता बोलाउने निर्णय गरेको सचिव देवेन्द्र पौडेलले जानकारी दिए । मोदीको ठाउँमा जनमत पार्टीकी अनितादेवी साहलाई मन्त्री बनाउने तयारी भएको उनले बताए ।

मोदी गत माघ ३ गते मन्त्री बनेका थिए । मोरङ क्षेत्र नम्बर ४ बाट लगातार दुई पटक निर्वाचन जितेका मोदी पहिलो पटक मन्त्री बनेका थिए ।

उनी २०७० को दोस्रो संविधान सभामा समानुपातिक तर्फबाट सांसद बनेका थिए । उनी माओवादी जनयुद्धमा भूमिगत राजनीति गरेका नेतासमेत हुन् ।

सिके राउत नेतृत्वको जनमत पार्टी यसअघि पनि सरकारमा सहभागी भएको थियो । उद्योग, वाणिज्य तथा आपूर्ति मन्त्रालय मागेको जनमतले भागबन्डामा उक्त मन्त्रालय नपाएपछि असन्तुष्टि जनाएको थियो ।

जनमतका उपाध्यक्ष अब्दुल खानलाई खानेपानी मन्त्री बनाइए पनि उनी धेरै दिनसम्म मन्त्रालय गएका थिएनन् । पछि मन्त्रालयमा पदभार सम्हालेका उनले चैत १७ गते मन्त्रीबाट राजीनामा दिएका थिए । संसदमा जनमत पार्टीका ६ सांसद छन् ।