अखबार नेपाल ट्रेन्डिङ

काठमाडौं: नेपाली कांग्रेसको केन्द्रीय कार्यसमितिको बैठकको पाँचौँ दिनमा जारी छ । गत मंगलबारदेखि पार्टी मुख्यालय सानेपामा बसिरहेको बैठक शनिबार एक दिनको विश्रामपछि पुनः बसिरहेको हो ।

बैठकमा अझै अढाई दर्जन केन्द्रीय सदस्यहरुले सम्बोधन गर्न बाँकी छ । आज सबैले बोलिसक्ने जनाइएको छ । बैठकमा सबै सदस्यहरुले बोलेपछि निर्णयहरु पारित गरिने छ ।

बैठकमा १० वटा एजेन्डा रहेका छन् । तर बोल्ने सदस्यहरुले एडेन्डामा बोल्नुभन्दा सभापति र महामन्त्रीका विषयमा मात्रै बोलेका छन् । केही औँलामा गन्न मिल्ने सदस्यहरुले मात्र पार्टी हित र संगठनका बारेमा बोलेका छन् ।

पहिलो पटक प्रत्यक्ष प्रशारण गरिएको कांग्रेस बैठकमा अधिकांश केन्द्रीय सदस्यहरुले सभापति शेरबहादुर देउवालाई भगवानकै रुपमा प्रस्तुत गरेका छन् । जसले देउवाको विकल्प छैन भनिरहेका छन् उनीहरुले महामन्त्री गगनकुमार थापालाई गाली गरिरहेका छन् ।

गगनले संसदीय दलको नेतामा देउवासँग चुनाव लड्नु र देउवा संसदमा सक्रिय नभएका अवस्थामा गगनले देउवालाई जिम्मेवार बन्न आग्रह गरिरहँदा देउवा निकटका केन्द्रीय सदस्यहरुले आलोचना गरेका छन् । त्यही झ्वाँकमा पार्टीलाई उर्जावान बनाउने र केन्द्रीय सदस्यहरु ११ महिना पार्टी कामलाई खटिएर जनताको बीचमा रहनु पर्ने योजना ल्याउँदासमेत आलोचना गरिरहेका छन् ।

विभिन्न एनजीओ र आईएनजीओकी अनुभवी देउवा पत्नी आरजू देउवा राणाले त महामन्त्रीको एक वर्षे कार्यक्रमको प्रतिवेदनलाई ‘एनजीओको विसलिष्ट’ जस्तो भएको आरोप लगाएकी छिन् । यसपालिको बैठक पार्टीको संगठनलाई मजबुद बनाउने भन्दा पनि कसरी एक अर्कामा हिलो छ्याप्ने भन्नेमै केन्द्रित देखिएको छ ।

यो प्रत्यक्ष प्रशारण गर्दा रणनीतिमा भन्दा आफ्नै नेतालाई गाली वा देवत्वकरणमा जोड दिइएको छ । लोकतान्त्रिक पद्धतिमा गाली र ताली सामान्य हो । अझ पार्टीलाई सशक्त बनाउन त नराम्रा पक्षको आलोचना गरी निखारिएर जानुपर्ने हुन्छ । केन्द्रीय सदस्यहरुले जिम्मेवार भएर आफ्नो भूमिका खोज्नुपर्ने हुन्छ ।

एजेन्डा भन्दा भजनमा बढी केन्द्रित भएकाले कांग्रेसको एक वर्षको क्यालेन्डर महामन्त्रीले ल्याएजस्तो चलायमान हुने किसिमको आउँछ कि एक वर्षसम्म बैठक नै नबसेर भएकै छ किन पार्टीका लागि ११ महिना काम गर्ने भनेर आरामदायी आउँछ भन्ने प्रतिक्षा नै रहेको छ ।

तर पार्टीमा कसैका पनि कुरा सुन्दैनन् भन्ने लागेको दाग हटाउन देउवाले प्रत्यक्ष प्रशारण गरेर उदार देखिएको बताए पनि यसले यसअघि गरेका एकलौटी निर्णयको गैरलोकतान्त्रिक पद्धति भने चोखो नहुने विश्लेषण भइरहेको छ ।