अखबार नेपाल ट्रेन्डिङ

काठमाडौं: नेपाली कांग्रेसले जिल्ला सभापतिहरूको बैठकबाट १४ बुँदे प्रतिबद्धता पारित गरेको छ । हिजो र आज बसेको जिल्ला सभापतिहरूको बैठकले ‘बदलिएको कांग्रेस र बलियो कांग्रेस बनाउने’ प्रतिबद्धता  गरेको हो ।

बैठकपछि महामन्त्री विश्वप्रकाश शर्माले जिल्ला सभापतिको भेलाले १२-१४ बुँदे प्रतिबद्धता गरेका जानकारी दिए । उनले भने, ‘महामन्त्रीहरूले बैठक नबोलाउँदा किन नगर्ने भनियो, अहिले विधानले दिएको व्यवस्था अनुसार बोलाउँदा किन बोलाएको भनिँदै रहेछ ।’

महामन्त्री शर्माले जिल्ला सभापतिहरूको भेला पार्टी सभापतिलाई जानकारी नदिईकन गरियो भन्ने कुरा बेकारको भएको बताए । उनले सभापतिलाई जानकारी दिएर भेलाको आयोजना गरिएको प्रष्ट पारे ।

‘सभापतिसित कतिपय विषयमा फरक मत हुँदै गर्दा विगतको प्रचलन भनेको होटलमा भेला गर्ने, सभापतिविरुद्ध एक प्रकारको धारणाहरु सार्वजनिक गर्ने हुने गरेको थियो’, महामन्त्री शर्माले भने,’अहिले सभापतिहरूको भेला केन्द्रीय कार्यालयमा भइरहेको छ र पार्टीको क्रियाशील सदस्यहरुलाई कसरी व्यवस्थित बनाउने, सबै तहको सम्मेलनहरु गरेर जाने भन्ने विषयमा कुरा भएको छ । यसमा कसैले पनि आशंका नगरौँ ।’

महामन्त्री शर्माका अनुसार भेलामा क्रियाशील सदस्य र पार्टी संगठकको सम्मेलनको विषयमा छलफल भएको छ । ‘जिल्ला सभापतिहरूले पनि कुन कुन काम कसरी कसरी लिएर कार्यकर्तामा जाने भन्ने विषयमा साझा ढंगको प्रतिबद्धता ल्याउँदै हुनुहुन्छ । पार्टीलाई चलायमान बनाउने गरी छलफल भएको छ’, उनले भने ।

महामन्त्री शर्माले सम्मेलनमा राष्ट्रिय राजनीति, जिल्लाको विषयमा छलफल भएको र जिल्ला सभापतिहरूले आफ्ना गुनासा सुनाएको बताए ।