अखबार नेपाल ट्रेन्डिङ

काठमाडौं: पूर्वराजा ज्ञानेन्द्र शाहले पृथ्वीनारायण शाहको ३०१औँ जयन्तीमा सन्देश दिँदै अङ्क र आकार प्रकारमा राजनीति अलमलिएको बताएका छन् ।

पूर्व राजाले विचार, आदर्श र सैद्धान्तिक निष्ठाभन्दा अङ्क र आकार प्रकारमा हाम्रो राजनीति अलमलिएको बताएका छन् । ‘सेवा र सुरक्षा दिन नसक्ने प्रजातन्त्रको जुनसुकै नाम र आवरणमा अभ्यास गरे पनि यसबाट राष्ट्रमा सुख हुन सक्ने छैन । विचार, आदर्श र सैद्धान्तिक निष्ठाभन्दा अङ्क र आकार प्रकारमा हाम्रो राजनीति अलमलिएको छ । त्यसैले राज्य पद्धति र प्रणाली सही प्रकारले पुनरावलोकन हुन आवश्यक देखिन्छ’, पूर्व राजाले भनेका छन् ।

पूर्वराजा शाहले वर्तमान राज्य प्रणाली र गणतान्त्रिक व्यवस्थाप्रति मुलुक खुसी नरहेको पनि बताएका छन् । उनले सन्देशमा भनेका छन्, ‘राष्ट्रियता बिनाको प्रजातन्त्र कागजी सिद्धान्त मात्र हुन्छ भन्ने हामीले ठानेका छौ । सेवा र सुरक्षा दिन नसक्ने प्रजातन्त्रको जुनसुकै नाम र आवरणमा अभ्यास गरे पनि यसबाट राष्ट्रमा सुख हुन सक्ने छैन ।’

उनले वर्तमान अवस्थामा हामी धेरै नै पराङमुखी, परनिर्भर र परावलम्बी हुँदा गएको बताएका छन् । उनले भनेका छन्, ‘इतिहास र भविष्य तथा नेपालीको स्वाभिमान सुरक्षित एवं संरक्षित हुन सक्छ भन्ने विश्वास लिएका छौं । वर्तमान अवस्थामा हामी धेरै नै पराङमुखी, परनिर्भर र परावलम्बी हुँदै गएका छौ । राष्ट्रको माटो, प्रकृति र आफ्नै प्रकारको प्रगति हाम्रा निम्ति प्रिय हुनु पर्दछ । हामी चाहन्छौँ- देश आफ्नै बाहुबलमा अघि बढोस्, राष्ट्र आफ्नै मौलिक मान्यतामा अघि बढोस्, सबै यत्न-प्रयत्न गतिविधि आफ्नै शैली ढाँचा तथा प्रक्रियाबाट अघि बढोस् ।’

उनले शाह वंशीय राजसंस्था आफ्नो जिम्मेवारीबाट नचुक्ने समेत बताएका छन् । ‘राज्य पद्धति र प्रणाली साह प्रकारले पुनरावलोकन हुनु आवश्यक राजनीतिक उतार चढावप्रति निरपेक्ष रहनु नेपाली राजसंस्था मौलिक विशेषता हो । राष्ट्र, राष्ट्रियता र जनहित प्रति समर्पित रहँदै समन्वयकारी जिम्मेवारी पुरा गर्न शाह वंशीय राजसंस्था कहिले चुकेको छैन ।’