अखबार नेपाल ट्रेन्डिङ

काठमाडौं: जनता समाजवादी पार्टी (जसपा) मा उपेन्द्र यादव र डा. बाबुराम भट्टराईबीच पार्टी विभाजन भए लगत्तै जसपाका नेता पूर्व मन्त्री हेमराज राईले पार्टी परित्याग गरेका छन् ।

जसपा केन्द्रीय कार्यकारिणी सदस्य रहेका पुर्वमन्त्री राईले साउन ९ गते संघीय परिषद् अध्यक्ष अशोक राईलाई राजीनामा पत्र बुझाईसकेको जानकारी प्राप्त भएको छ ।

जसपा संघीय अध्यक्ष अशोक राईले पनि जसपा छाड्ने खबरहरु बजारमा आईरहेका बेला अशोक राईका दाहिने मानिने हेमराज राईले पार्टी परित्याग गर्नुलाई अर्थपूर्ण रुपमा हेरिएको छ ।

जसपाका संघीय अध्यक्ष सहित बामपन्थी रुझानका नेताहरु एमालेमा प्रवेश चर्चा चलिरहँदा राई बाहिरिएका छन् ।

उपेन्द्र यादव र बाबुराम भट्टराईबीच द्वन्द हुँदा अशोक राईहरु बाबुरामतिर थिए । उनीहरुकै सल्लाहमा सके पार्टी कब्जा गर्ने नभए अर्को पार्टी खोल्ने योजना भैरहँदा अशोकहरुले बाबुलाई धोका दिएको बताइन्छ ।

पार्टीको अन्तिम लडाईमा अशोकहरु उपेन्द्रतिर लहस्सिएका थिए । अशोकहरु पुरानै पार्टीतिर फर्कने चर्चा भने अझै सेलाएको छैन ।

जसपा छाड्नुको कारण बारे राईले नीति, विचार र संगठन सञ्चालनमा कुरा नमिलेपछि पार्टी छोडेको बताईरहँदा जसपाका अन्य नेताहरू पनि पार्टी छोड्ने तयारीमा रहेको उनको भनाइ छ ।

उनी २०५५ सालमा गिरिजाप्रसाद कोइराला नेतृत्वको सरकारमा उद्योग मन्त्री थिए ।

नेकपा (एमाले)मा रहेर लामो समय राजनीति गरेका उनी अशोक राईसँगै संघीय समाजवादी पार्टीमा लागेका थिए । राई फेरि एमाले प्रवेशको तयारीमा रहेका छन् । यद्यपि, यो विषयमा ठोस निर्णय भइनसकेको उनी बताउँछन् ।

२०७८ माघ १२ गते सम्पन्न राष्ट्रिय सभा निर्वाचनमा सत्ता गठबन्धन र एमालेबीच प्रतिष्पर्धा भएको थियो । नेपाली कांग्रेस, नेकपा (माओवादी केन्द्र), नेकपा (एकीकृत समाजवादी), जसपा र राष्ट्रिय जनमोर्चाले गठबन्धन बनाएर चुनाव लडेका थिए ।

हेमराज राई गठबन्धनबाट उम्मेदवारी दिएका १९ मध्ये १८ उम्मेदवार राष्ट्रिय सभा सदस्यमा निर्वाचित भएपनि गठबन्धनबाट पराजित एक मात्र उम्मेदवार हुन् ।

प्रदेश १ बाट अपाङ्गता भएका व्यक्ति वा अल्पसङ्ख्यक समूहबाट उम्मेदवारी दिएका राईलाई एमालेका सोनाम ग्याल्जेन शेर्पाले पराजित गरेका थिए । गठबन्धनले घात गरेको र पार्टी भित्रैबाट असहयोग भएको भन्दै त्यसबेलादेखि राई असन्तुष्ट रहँदै आएका थिए ।

अशोक राईसँ एमाले छाडेर संघीय समाजबादीतिर लागेका हेमराज राई एमालेमै फर्कने तयारीमा रहेको बुझिएको छ ।