अखबार नेपाल ट्रेन्डिङ

काठमाडौं: प्रधानमन्त्री शेरबहादुर देउवा कांग्रेस टोलीसहित प्रमुख प्रतिपक्षी एमालेको अवरोध खुलाउन एमाले अध्यक्ष केपी शर्मा ओली भेट्न बालकोट गएका छन् ।

गत भदौ २३ गतेदेखि प्रतिनिधिसभामा एमालेले गरिरहेको अवरोध खुलाउन देउवा भक्तपुरको बालकोटस्थित अध्यक्ष ओलीको निवास गएका हुन् ।

प्रधानमन्त्री देउवासँगै कांग्रेसका नेता एवं सञ्चारमन्त्री कार्की, कांग्रेसका उपसभापति पूर्णबहादुर खड्का र महामन्त्री गगनकुमार थापा पनि बालकोट गएका छन् ।

प्रधानमन्त्री देउवाले अमेरिकी सहायता परियोजना सम्झौता अनुमोदनका लागि अवरुद्ध संसद् सञ्चालन गराउन यही फागुन ५ गतेदेखि निरन्तर एमाले अध्यक्ष ओलीलाई भेटेरै आग्रह गरिरहेका छन् ।

प्रधानमन्त्री देउवाले फागुन ५ गते बिहान कांग्रेस नेता डा. मिनेन्द्र रिजाललाई ओलीसँग वार्ताका लागि बालकोट पठाएका थिए ।

त्यससँगै सञ्चारमन्त्री ज्ञानेन्द्रबहादुर कार्कीले पनि ओलीसँग टेलिफोन वार्ता गरेका थिए ।

त्यस यता प्रधानमन्त्री देउवा र एमाले अध्यक्ष ओलीबीच तीन पटक वार्ता भइसकेको छ ।

गत बिहीबार प्रतिनिधिसभा बैठक स्थगित गरेर उनले ओलीसँग संघीय संसद भवनमै अवरुद्ध संसद सुचारु र एमसीसी पारितका विषयमा छलफल गरेका थिए ।

सोही दिन बेलुकी उनीहरुका बीचमा प्रधानमन्त्रीको सरकारी निवास बालुवाटारमा पनि सहमतिको प्रयास स्वरुप छलफल भएको थियो ।

यस्तै शुक्रबार बेलुकी पनि प्रधानमन्त्री देउवा र एमाले अध्यक्ष ओलीबीच बालकोटमै छलफल भएको थियो ।