अखबार नेपाल ट्रेन्डिङ

काठमाडौं: सुरक्षामा लापरबाही देखिएको भन्दै नेपाल वायु सेवा निगमका विमानस्थल सुरक्षा कमाण्डर ध्रुवराज थापालाई निलम्बन गरिएको छ ।

कतार उडान भर्ने विमानमा अनधिकृत व्यक्तिको प्रवेश भएको विषयलाई लिएर थापालाई निलम्बन गरिएको हो ।

संस्कृति पर्यटन तथा नागरिक उड्डयन मन्त्री प्रेम आलेले सो घटनाको तत्काल छानबिन गरी दोषीमाथि कारबाही गर्न निगमका कार्यकारी अध्यक्ष युवराज अधिकारीलाई निर्देशन दिएका थिए ।

निगमले तत्कालै क्याप्टेन विजय लामाको संयोजकत्वमा छानविन उपसमिति गठन गरेको छ ।

निगमको 9N-ALY, Airbus 330 जहाज दोहा उड्ने क्रममा गत फागुन ९ गते जहाजको ढोकामा बोर्डिङपास र सुरक्षा चेकजाँचबिनाका शंकास्पद व्यक्ति भेटिएका थिए ।

सो घटनाले विमानस्थल सुरक्षामै प्रश्न उठेपछि निगमलाई छानबिनका लागि मन्त्री आलेले निर्देशन दिएका थिए ।

छानबिन समितिलाई शुक्रबारसम्मको समय दिइएको छ ।