काठमाडौं: गृहमन्त्री रामबहादुर थापा ‘बादल’ सांसद पदबाट बर्खास्त भएका छन् ।

पार्टी परित्याग गरेर नेकपा एमाले (ओली समूह) मा प्रवेश गरेका कारण नेकपा माओवादी केन्द्रले कारबाही गरेपछि उनको राष्ट्रिय सभा-सदस्य पद खारेज भएको हो ।

माओवादी केन्द्रले दर्ता गराएको सूचना अनुसार संघीय संसदले उनको सांसद पद खारेज भएको जानकारी गराएको हो ।

गत पुस ५ गते प्रधानमन्त्री केपी शर्मा ओलीले संसद् विघटनको निर्णय गरेपछि तत्कालीन नेकपा दुई समूहमा विभाजन भएको थियो ।

त्यस क्रममा प्रचण्ड छाडेर गृहमन्त्री थापासहित माओवादीका २३ जना केन्द्रीय नेता ओली समूहमा सामेल भएका थिए ।

संसद् पुनःस्थापनाको फैसलापछि सर्वोच्च अदालतले गत फागुन २३ गते नेकपाको एकता अवैधानिक भएको ठहर गर्दै यसमा मिसिएका एमाले र माओवादी केन्द्रलाई मान्यता दिने फैसला गर्यो ।

त्यसपछि नेकपामा रहेका दुई पार्टीका नेताहरू आ-आफ्ना पार्टीमा फर्के पनि गृहमन्त्री थापासहित २३ नेता एमाले अर्थात् ओली समूहमै रहे ।

तसर्थ नेकपा माओवादी केन्द्रले उनीहरूलाई स्पष्टीकरणपछि पार्टीको साधारण सदस्यबाटै बर्खास्त गरेको हो भने सांसद रहेकालाई राजनीतिक दल सम्बन्धी ऐन अनुसार आफू निर्वाचित भएको पार्टी छाडेपछि सांसद पद पनि जाने प्रावधान अनुसार संघीय संसदलाई कारबाही अघि बढाउन सूचना गरेको हो ।

सोही बमोजिम संघीय संसदले उनीहरूको सांसद पद खारेज गरेको हो ।

बार्सिलोनालाई ३१औं पटक कोपा डेल रेको उपाधि