अखबार नेपाल ट्रेन्डिङ

काठमाडौं: नेत्र विक्रम चन्द विप्लव नेतृत्वको नेकपाले गरेको नेपाल बन्दका कारण आज राजधानीसहित देशभरको विभिन्न जिल्लाको जनजीवन प्रभावित भएको छ ।

राजधानीमा सार्वजनिक सवारी साधन कम चलेका छन् भने राजधानी बाहिरिने र भित्रिने सवारी साधन पनि प्रभावित बनेका छन् । आफ्ना पक्राउ परेका नेता कार्यकर्ताको रिहाइको माग गर्दै विप्लव समूहले बन्दको आह्वान गरेको हो । विप्लव समूहले कलकारखाना, शैक्षिक संस्था, यातायात र व्यापार व्यवसाय सबै बन्द गर्ने जनाएको छ ।

सरकारले विप्लव समूहले हिंसात्मक गतिविधि गर्न थालेको भन्दै प्रतिबन्ध लगाएको छ । बन्दको कारण जिल्लामा समेत बन्दको आंशिक प्रभाव रहेको भएका छन् । यसैबीच काभ्रेको पनौतीमा, अर्घाखाँचीको सन्धिखर्क २ भद्रखोला नजिक, बागलुङको शिवधारा चोकमा, हेटौंडा उपमहानगरपालिका-१९ तिनताप्केमा, मोरङको सुन्दरहरैंचा-७ बेलगाछीमा, कैलालीको लम्की चुहा नगरपालिका १ लम्की बस पार्कमा पनि शंकास्पद बस्तु फेला परेको छ ।

पोखरामा गण्डकी प्रदेशसभा भवन प्रबेश गेट आगाडी र जिरोकिलो नजिकै शंकास्पद बस्तु डिस्पोज गर्ने क्रममा एकजना नेपाली सेना घाइते भएका छन् । त्यसैगरी पाल्पा रिब्दीकोट गाउँपालिकाको कार्यालय परिसरमा वम विष्फोट हुँदा प्रतिक्षालय र गाउँपालिकाको कार्यालय भवनमा क्षति पुगेको छ ।