अखबार नेपाल ट्रेन्डिङ

काठमाडौं: इरानमा हिजाबको विषयलाई लिएर चर्किएको प्रदर्शन देशका ८० भन्दा बढी सहरमा विस्तार भएको छ ।

दुई हप्ताअघि एक युवतीलाई हिजाब नलगाएको आरोपमा प्रहरीले नियन्त्रणमा लिएकै समयमा हिरासतमा मृत्यु भएपछि महिलाहरु देशव्यापी प्रदर्शनमा छन् ।

प्रदर्शनमा पुरुषको पनि सहभागिता बढेको छ । प्रदर्शनका क्रममा भएका झडपमा कम्तीमा ३५ जना प्रदर्शनकारीको मृत्यु भइसकेको छ । यस्तै ५ जना सुरक्षाकर्मी मारिएका छन् ।

प्रदर्शनकारीले देशका सर्वोच्च नेता अयातुल्लाह अली खामेनेईविरुद्ध नाराबाजी गरिरहेका छन् । इरानी टेलिभिजनहरुका अनुसार इरानमा यति ठूलो विरोध प्रदर्शन पहिलो पटक भएको हो ।

देशभर प्रदर्शन चर्किँदै गएपछि राष्ट्रपति इब्राहिम रईसीले हिरासतमा युवतीको मृत्युको घटना छानबिन गर्न आदेश दिएका छन् ।

साथै उनले प्रदर्शनकारीमाथि बल प्रयोग गर्नसमेत आदेश दिएका छन् । यद्यपि देशभर जारी प्रदर्शन थप बढ्ने क्रममा रहेको इरानी सञ्चारमाध्यमहरुले जनाएका छन् ।