अखबार नेपाल ट्रेन्डिङ

फोहोरी राजनीतिमा गठबन्धन  घरमा काल भित्रिएझैँ  भित्रिएपछि

चर्चा-परिचर्चा फुटपाथदेखि सदनसम्म चुलिएको छ

मानौँ, म भन्दा बलवान् र शक्तिशाली कोही र केही छैन

म हुँ कि को हुँ केही थाहा छैन

उता गठबन्धनले ठगबन्धन उपनाम र उपमा पाएकै छ

तैपनि आफूले गरेको गठबन्धन

अरूले गरेको ठगबन्धन हुन्छ फोहोरी राजनीतिमा !

नेपाली उखान- बुढी मरीभन्दा पनि घरमा काल पस्यो

गठबन्धन राजनीतिमा काल बनेर पसेको छ

यो गठबन्धन इतिहासकै कलङ्क हो

आजीवन सूर्य चिन्हको सिद्धान्त बोकियो- भोट हलोमा !

आजीवन हँसिया-हथौडा चिन्हको सिद्धान्त रटियो सुगाले रटेझैँ- भोट रुखमा !

आजीवन समाजवादको व्याख्या गरियो- भोट हँसिया-हथौडामा !

यो गठबन्धन हो कि ठगबन्धन ?

यो गठबन्धनले ठगबन्धन भित्र्यायो

ठगबन्धनले गठबन्धन भित्र्यायो- फोहोरी राजनीतिमा !

फोहोरी राजनीतिमा गठबन्धन प्रजातन्त्रका लागि काल बनेर पसेको छ

अब ती समाजवादका सिद्धान्त रद्दीको टोकरीमा फालिदिए हुन्छ

ती साम्यवादका सपना गर्भमै तुहिएपछि खाल्डोमा पुरी दिए हुन्छ

ती जनवादका सिद्धान्तलाई चिताको ज्वालामा खरानी बनाए हुन्छ

फोहोरी राजनीतिमा आफूले गरे गठबन्धन !

फोहोरी राजनीतिमा अरूले गरे ठगबन्धन ?

दर्शनाचार्य, त्रिभुवन विश्वविद्यालय, कीर्तिपुर ।