अखबार नेपाल ट्रेन्डिङ

काठमाडौं: नेपालस्थित इजरायली दूतावासले यही मंसिर १० र ११ गते होटल सोल्टीको पार्किङ्ग क्षेत्रमा १३औं इजरायली चलचित्र महोत्सवको आयोजना गर्ने भएको छ ।

इन्टरनेशनल साउण्ड सर्भिसेसको प्रावधिक सहकार्यमा महोत्सव हुन लागेको हो । ‘यस महोत्सवसंगै नेपालमा एक पृथक किसिमको चलचित्र शो भित्राउने प्रयास गरिने छ – ड्राइभ–इन शो । हुन त विश्वमा ड्राइभ–इन शो नौलो होइन, तर नेपालमा भने यो पहिलो पटक आयोजना हुँदैछ’ दूतावासले विज्ञप्तिमा भनेको छ ।

आफ्नै गाडीभित्रको सुरक्षित घेरामा बसेर हेर्ने यो चलचित्र महोत्सवले कोरोनाका कारण प्रभावित भएको फिल्म क्षेत्रलाई यस अवधारणाले टेवा दिने अपेक्षा लिइएको दूतावासले जनाएको छ ।

आफ्नो परिवारसँग बसेर सामाजिक दूरी कायम राखेर चलचित्र हेर्न चाहने कुनैपनि व्यक्तिको लागि यो शो खुला रहनेछ । तर आफ्नो पार्किङ्ग स्थान सुरक्षित गर्नको लागि सोल्टि होटलको वेब साइट www.soaltee.com मा गई फर्म भर्नुपर्ने हुन्छ ।

यस्ता सांस्कृतिक महोत्सवले दुई देशका जनताबीच प्रगाढ सम्बन्ध विस्तार गर्न मद्दत गर्ने विज्ञप्तिमा उल्लेख छ ।