अखबार नेपाल ट्रेन्डिङ

काठमाडौं: गुराँस लाइफ इन्स्योरेन्स कम्पनीको नाफा बढे पनि बीमा शुल्क आर्जन भने घटेको छ । नाफा ४४.२७ प्रतिशतले बढेको कम्पनीको बीमा शुल्क आर्जन १६.१३ प्रतिशतले घटेको छ ।

गत आर्थिक वर्ष २०७८/७९ को चौथो त्रैमासमा कम्पनीले १७ करोड ५१ लाख रुपैयाँ खुद नाफा आर्जन गरेको छ । आर्थिक वर्ष २०७७/ ७८ मा कम्पनीले १२ करोड १३ लाख रुपैयाँ खुद नाफा कमाएको थियो । कम्पनीको खुद नाफा अघिल्लो वर्षको भन्दा ४४.२७ प्रतिशत बढेको हो ।

कम्पनीले गत आवमा ३ अर्ब ५ करोड रुपैयाँ बीमा शुल्क आर्जन गरेको छ । अघिल्लो वर्ष खुद बीमा शुल्क आर्जन ३ अर्ब ६३ लाख रुपैयाँ थियो । अघिल्लो वर्षको तुलनामा कम्पनीको बीमा शुल्क १६.१३ प्रतिशले घटेको छ ।

गत वर्ष सोही अवधिमा कम्पनीले १ अर्ब ६२ करोड ६५ लाख रुपैयाँ दाबी भुक्तानी गरेको छ । अघिल्लो वर्ष ६६ करोड २७ लाख रुपैयाँ दाबी भुक्तानी गरेको थियो । कम्पनीले गत वर्ष २० लाख ८२ हजार रुपैयाँ दाबी भुक्तानी दिन बाँकी छ ।

यस्तै, इन्स्योरेन्सले बीमालेख धितोमा राखेर कर्जाबाट ११ करोड ३६ लाख रुपैयाँ आर्जन गरेको छ । अघिल्लो वर्ष सोही अवधिमा ८ करोड ३४ लाख रुपैयाँ आर्जन गरेको थियो ।

कम्पनीको सञ्चालन खर्च भने घटेको छ । गत आर्थिक वर्षमा व्यवस्थापनका लागि ३ करोड ५६ लाख रुपैयाँ खर्च गरेको छ । अघिल्लो वर्ष सोही अवधिमा व्यवस्थापन खर्च ५ करोड रुपैयाँ थियो ।

गत वर्ष कम्पनीले ३६ करोड ८३ लाख रुपैयाँ अभिकर्ता कमिसनका लागि खर्चिएको छ । अघिल्लो वर्ष सोही अवधिमा ५३ करोड रुपैयाँ अभिकर्ता कमिसनमा खर्च भएको कम्पनीले जनाएको छ । कम्पनीको प्रतिसेयर आम्दानी ८.४० रुपैयाँ छ भने प्रतिसेयर नेटवर्थ १३१. ७८ रुपैयाँ छ ।

चुक्ता पुँजी २ अर्ब ८ करोड रुपैयाँ रहेको कम्पनीको जगेडा कोषमा ५८ करोड ७४ लाख रुपैयाँ सञ्चित छ । जीवन बीमा कोषमा १२ अर्ब ४५ करोड रुपैयाँ छ भने महाविपत्ति कोषमा ७५ करोड रुपैयाँ छ ।