अखबार नेपाल ट्रेन्डिङ

काठमाडौं: साविक विश्व विजेता अर्जेन्टिनाले फिफा विश्वकप २०२६ को अन्तिम १६ मा इजिप्टसँग खेल्दैछ । यो खेल अमेरिकाको एटलान्टामा नेपाली समय अनुसार मंगलबार राती ९:४५ बजे सुरु हुनेछ । अर्जेन्टिना र इजिप्ट विश्वकपमा पहिलो पटक आमने सामने हुन लागेका हुन् ।

विश्व फुटबलकै सुपर स्टार लियोनल मेसीको कप्तानीमा रहेको अर्जेन्टिना अहिले लयमा देखिएको छ र ३ पटकको विश्व विजेता अर्जेन्टिना ६४ वर्षपछि विश्वकपमा उपाधि रक्षा गर्ने पहिलो टोली बन्ने लक्ष्यका साथ मैदानमा उत्रिनेछ । फिफा वरियतामा १ नम्बरमा रहेको अर्जेन्टिना १९औं पटक विश्वकप खेलिरहेको छ ।

सन् १९३४ मा पहिलो पटक विश्वकपमा सहभागिता जनाउँदा सिधै अन्तिम १६ मा खेलेको इजिप्टले ९२ वर्षमा पहिलो पटक समूह चरण पार गर्दै यस विश्वकपमा नकआउट चरण खेलेको हो र नकआउटमा पहिलो जित समेत हात पारिसकेको छ । हाल इजिप्ट फिफा वरियतामा २९औं स्थानमा छ ।

जारी विश्वकपमा अर्जेन्टिनाले कुनैपनि खेल्दा वा जित्दा जहिले पनि लियोनल मेसीकै चर्चा हुन्छ । विपक्षी टिम मेसीलाई कसरी रोक्ने भन्ने तयारी गरिरहेका हुन्छन् भने अर्जेन्टिनाको टिम मेसीबाट कसरी बढी फाइदा लिने भन्नेमा हुन्छ । हरेक खेलमा केही न केही कीर्तिमान बनाइरहेका मेसीले ३९ वर्षको उमेर पनि विश्वकपमा जादुयी प्रदर्शन गरिरहेका छन् ।

अर्जेन्टिनाले जारी विश्वकपमा खेलेको सबै चार खेल जितेको छ । समूह चरणमा अल्जेरियालाई ३-० ले, अस्ट्रियालाई २-० ले र जोर्डनलाई ३-१ ले पराजित गरेको थियो । समूह चरणमा तीनै खेलमा सहज जित हात पारेको अर्जेन्टिनाले राउण्ड अफ ३२ मा डेब्यु केप भर्डेलाई अतिरिक्त समयमा ३-२ ले पराजित गरेको हो ।

इजिप्टको पनि अहिलेसम्म अपराजित छ । समूह चरणमा बेल्जियमसँग १-१ को बराबरी खेलेका इजिप्टले न्युजिल्यान्डलाई ३-१ ले पराजित गरेको थियो भने इरानसँग १-१ को बराबरी खेलेको थियो । समूह जी को उपविजेताको रुपमा नकआउट चरणमा पुगेको इजिप्टले अस्ट्रेलियालाई पेनाल्टीसुटआउटमा ४-२ ले पराजित गरेको थियो ।

अन्तिम ३२ मा दुवै टोलीले संघर्षपूर्ण जित निकालेका थिए । अफ्रिकाको नवप्रवेशी केप भर्डेलाई ३-२ गोल अन्तरले पराजित गरेको अर्जेन्टिनाले अन्तिम १६ मा अर्को अफ्रिकी टिमसँग खेल्न लागेको हो । इजिप्टले भने एसियन कोटाबाट खेल्ने अस्ट्रेलियालाई पेनाल्टी सुटआउटमा पराजित गरेको थियो ।

अर्जेन्टिना र इजिप्ट विश्वकपमा अहिलेसम्म भिडेका छैनन् र यो पहिलो भेट हुनेछ । यस्तै समग्रमा भने यी दुई टोली तेस्रो पटक खेल्न लागेका हुन् । यसअघि भएको दुई खेल अर्जेन्टिनाले जितेको थियो । सन् १९२८ मा भएको ओलम्पिक फुटबलमा अर्जेन्टिनाले इजिप्टलाई ६-० ले पराजित गरेको थियो । पछिल्लो पटक सन् २००८ मा इजिप्टकै कायरोमा भएको मैत्रीपूर्ण खेलमा अर्जेन्टिना २-० ले विजयी भएको थियो ।

मेस भर्सेज सालाह

लियोनल मेसी विश्वकपमा सर्वाधिक ३० खेल खेल्ने सर्वाधिक २० गोल गर्ने लगातार ८ खेलमा गोल गर्ने, सर्वाधिक ६ विश्वकप खेल्ने जस्ता विभिन्न कीर्तिमान बनाइसकेका छन् । यस्तै सर्वाधिक असिस्ट गर्नेमा पनि संयुक्त रुपमा शीर्ष स्थानमा छन् । यदि इजिप्ट विरुद्ध असिस्ट गरेमा उनी सर्वाधिक ९ असिस्ट गर्ने खेलाडी बन्नेछन् ।

यस विश्वकपमा मेसीले लगातार गोल गर्दै कीर्तिमान बनाएपनि फरवार्ड लाइनमा अन्य खेलाडीबाट गोल निस्कन सकेको छैन । विशेषरी लाउटारो मार्टिनेज र युलिजयन अल्भारेजले गोलका लागि संघर्ष गरिरहेका छन् । उनीहरुका लागि पनि नकआउटको खेलमा आफूलाई प्रमाएत गर्ने अवसर छ ।

यस्तै मोहमद सालाह इजिप्टका कप्तान र सबैभन्दा ठूला स्टार हुन् । क्लब फुटबलमा धेरै उपलब्धि हात पारिसकेका छन् । विश्वकपमा उनले आफ्नो टिमलाई पहिलो पटक नकआउट चरणमा पुर्‍याएका छन् । अर्जेन्टिना विरुद्ध खेल्दा सालाह इजिप्टका मुख्य खेलाडी हुनेछन् । यस्तै दुई गोल गरेका इमाम असौर पनि इजिप्टको हेर्न लायक खेलाडीको रुपमा छन् ।