अखबार नेपाल ट्रेन्डिङ

काठमाडौं: संयोगान्त र बियोगान्त भावमा बहेर प्रेम, पीडा, विछोड, मिलन र सम्झनाको समेत कल्पना गर्नुपर्ने गीतकार, अनि उस्तै अवस्था आइपरे ‘गोली ठोक्न’ आदेश पनि दिनुपर्ने प्रहरी अफिसर । नेपाल प्रहरीको निरीक्षकबाट सेवा प्रवेश गरेर २०८२ साल भदौ १९ गते प्रहरी अतिरक्त महानिरीक्षकबाट अवकाश नहुँदासम्म चर्चित गीतकार टेक तामाङलाई ‘यो सम्भव छ ?’ भनेर बारम्बार प्रश्न सोधिन्थ्यो ।

पेशागत प्रहरी जीवनमा आफूलाई ‘रोल मोडल’ सावित गराएका चर्चित गीतकार तामाङले गीत र साहित्य सिर्जनालाई पनि सँगसँगै अघि बढाएर व्यवहारबाटै ‘सम्भव छ’ भन्ने जवाफ दिए । उनै चर्चित गीतकारको नयाँ म्युजिक भिडियो ‘अल्झिरह्यो याद’ हालै टेक तामाङ युट्युब च्यानलमार्फत् सार्वजनिक भएको छ । संयोगान्त र बियोगान्त झैं लाग्ने म्युजिक भिडियो ‘अल्झिरह्यो याद’ लाई आमदर्शक-श्रोताले अत्यधिक रुचाउने अपेक्षा गरिएको छ भने हेर्ने-सुन्ने दर्शक-श्रोताले मन छोएको प्रतिक्रिया दिइरहेका छन् ।

‘अल्झिरह्यो याद, बल्झिरह्यो घाऊ

जलिरह्यो यो मन, निभाउन म कहाँ जाऊँ ।’

वरिष्ठ गायक प्रदीपराज पाण्डेको स्वर रहेको ‘अल्झिरह्यो याद’ म्युजिक भिडियोमा कलाकार सनम कठायत र ऋचा थापाले अभिनय गरेका छन् भने म्युजिकमा मधुकर लोहनी, रेकर्डिङमा भोला पैडेल, एरेञ्जरमा मनोहर सुनाम, मेकअपमा मही सिंह, सिनेमाटोग्राफरमा एजे अजु, सहयोगी कलाकारमा विना के.सी., इन्द्र गुरुङ, कल्पना गुरुङ, रामबहादुर थापा, प्रनिता हमाल रहेका छन् । त्यस्तै म्युजिक भिडियोलाई प्रदीप हमालले निर्देशन गरेका हुन् । साउण्ड डिजाइन, नक्सालमा गीत रेकर्डिङ गरिएको म्युजिक भिडियोमा एडिट-कलर मीन रावलको छ भने एडिटिङ स्टेशन दिनपरी क्रियशन प्रा.लि. रहेको छ ।

सुमधुर गीत-संगीत, स्वर र अभिनयले सजिएको म्युजिक भिडियोका रचनाकार चर्चित गीतकार टेक तामाङलाई कलम र बन्दूकको बेजोड समिश्रण गराउन सफल सर्जकका रुपमा चिनिन्छ भने उनले गीतसँगै साहित्यमा पनि उत्तिक्कै उचाइ भेट्टाएका छन् । गीतकार संघको आयोजनामा भएको ‘गीतकार टेक तामाङ सांगीतिक साँझ २०८२’ सांगीतिक दुनियाँको ऐतिहासिक कार्यक्रम सावित भएको थियो ।

‘म तिम्रो शहर छोडी टाढा-टाढा जाँदैछु…’ जस्ता कालजयी गीतमार्फत् छाप छोडेका वरिष्ठ गायक प्रदीपराज पाण्डेको स्वरमा सजिएको र आफूलाई पेशागत रुपमा ‘रोलमोडल’ सावित गरेका चर्चित गीतकार टेक तामाङको शब्द रहेको प्रेम, पीडा, बिछोड, मिलन र सम्झनाको गहिरो मर्म बोकेको म्युजिक भिडियो ‘अल्झिरह्यो याद’ तपाईंले पनि सुनेर र हेरेर अनुभूत गर्न सक्नुहुनेछ ।