अखबार नेपाल ट्रेन्डिङ

काठमाडौं: नेकपा एमालेको ११औं महाधिवेशन अन्तर्गत बन्दसत्रको तेस्रो दिन आज काठमाडौंको भृकुटीमण्डपमा साँझबाट नयाँ नेतृत्व चयनका लागि मतदान सुरु हुँदैछ । दुई हजार २६२ जना प्रतिनिधिले एमालेको भावी नेतृत्वसहित पदाधिकारीको टिम चुनिने छन् ।

१९ पदाधिकारीका लागि ४१ जना चुनावी मैदानमा छन् । अध्यक्षमा विगत लामो समयसँगै रहेका वर्तमान अध्यक्ष केपी शर्मा ओली र वरिष्ठ उपाध्यक्ष ईश्वर पोखरेलबीच प्रतिस्पर्धा हुँदैछ । उनीहरू प्यानल नै बनाएर प्रतिस्पर्धामा उत्रिएका छन् । पाँच उपाध्यक्षका लागि ११ जना प्रतिस्पर्धामा उत्रिएका छन् । ओली समूहबाट रामबहादुर थापा, विष्णु पौडेल, गुरु बराल र पृथ्वीसुब्बा गुरुङ छन् । महासचिवमा नपाएपछि ओली टिमकै प्रदीप ज्ञवालीले भने उम्मेदवारी दिएनन् ।

पोखरेल समूहबाट अरुण नेपाल, गोकर्ण विष्ट, विन्दा पाण्डे, परशुराम मेघी गुरुङ, टंक कार्कीले उपाध्यक्षमा उम्मेदवारी दिएका छन्। ओलीको टिममा केन्द्रीय सदस्यमा सीमित भएका रघुजी पन्त र भीम आचार्यले पनि उपाध्यक्षमा उम्मेदवारी दिएका छन् । यस्तै, एक महासचिवका दुई प्रतिस्पर्धी छन् । ओली समूहबाट शंकर पोखरेल दोहोरिँदा पोखरेल समूहबाट सुरेन्द्र पाण्डे भिड्दैछन् ।

तीन उपमहासचिवमा ७ प्रतिस्पर्धी छन् । ओली टिमबाट रघुवीर महासेठ, लेखराज भट्ट र विष्णु रिमाल उम्मेदवार छन् । टिममा नपरेपछि राजेन्द्र गौतमले पनि उपमहासचिवमै उम्मेदवारी दिए पनि उनले फिर्ता लिइसकेका छन् । पोखरेल समूहबाट योगेश भट्टराई, बैजनाथ चौधरी र आनन्द पोखरेल उपमहासचिवका उम्मेदवार हुन् । ओली टिममा नपरेका पोखरेललाई अन्तिम समयमा इतर समूहमा ल्याउन नेताहरू सफल भएका हुन् ।

यसैगरी ९ सचिवका लागि सबैभन्दा धेरै २० जनाबीच प्रतिस्पर्धा हुँदैछ । ओली टिमबाट छविलाल विश्वकर्मा, पदमा अर्याल, राजन भट्टराई, भानुभक्त ढकाल, खगराज अधिकारी, शेरधन राई, यमलाल कँडेल, हिक्मत कार्की र महेश बस्नेत सचिवका उम्मेदवार हुन् । पोखरेल समूहबाट कर्ण थापा, इन्द्रलाल सापकोटा, कृष्णगोपाल श्रेष्ठ, गोकुल बास्कोटा, ठाकुर गैरे, पुरुषोत्तम पौडेल, रचना खड्का र अग्नि खरेल सचिवमा उम्मेदवार छन् । खरेल ओलीको साथ छाडेर पोखरेल समूहबाट उम्मेदवार बनेका हुन् । ओली टिममा केन्द्रीय सदस्यमा मात्रै समेटिएका लालबाबु पण्डितले पनि उम्मेदवारी दिएका छन् भने पेम्बा लामा पनि चुनावी मैदानमा छन् ।

पदाधिकारी निर्वाचनमा महिला उम्मेदवार संख्या भने अत्यन्त न्यून छन् । जसकारण नेतृत्व तहमा महिलाको उपस्थिति कमजोर हुने देखिएको छ । अध्यक्षदेखि सचिवसम्मका १९ पदाधिकारी पदका लागि ४२ जना उम्मेदवार मैदानमा उत्रिँदा चार जना मात्रै महिला उम्मेदवार छन् । दुबै पक्षबाट गरी ११ उपाध्यक्षका जउम्मेदवार प्रतिस्पर्धामा उत्रिँदा महिलातर्फ बिन्दा पाण्डे मात्रै छिन् । उनले पोखरेल प्यानलबाट उम्मेदवारी दिएकी हुन् ।

सचिव पदमा पनि महिला उम्मेदवारी कमजोर देखिएको छ । ९ सचिव पदका लागि २० जना उम्मेदवार प्रतिस्पर्धामा रहेकामा ३ जना महिला उम्मेदवार छन् । ओली प्यानलबाट पद्मा अर्याल दोस्रो कार्यकालका लागि उम्मेदवार बनेकी छन् भने पोखरेल प्यानलबाट रचना खड्का उम्मेदवार छन् । पेम्बा लामाले पनि सचिव पदमा उम्मेदवारी दिएकी छन् । महासचिव र उपमहासचिव पदमा भने महिला उम्मेदवारी परेको छैन । सीमित उम्मेदवारी परेकामा पनि आरक्षणको व्यवस्था नरहेकाले अधिकांश पदाधिकारीमा चुनिने सम्भावना शून्य देखिन्छ ।