अखबार नेपाल ट्रेन्डिङ

काठमाडौं: भदौ २६ गतेदेखि काठमाडौंको भृकुटीमण्डपमा १५औं नाडा अटो शो-२०२३ जारी छ । अटो शोमा उपस्थित भएका अवलोकनकर्ताहरूको संख्या र सवारीसाधन बुकिङले व्यवसायीहरू उत्साहित देखिएका छन्‌ ।

भदौ ३१ गतेसम्म चल्ने अटो शोमा विभिन्न ब्राण्डका सवारी साधनहरूको प्रदर्शनीमा राखिएको छ । शोमा पहिलो दिनदेखि नै अवलोकनकर्ताहरूको बाक्लो उपस्थिति छ । अटो शोमा उपस्थित भएका अवलोकनकर्ताहरूको संख्याले उत्साह थपिएको अटो मोबाइल्स एसोसिएसन अफ नेपाल (नाडा)को अध्यक्ष ध्रुव थापा बताउँछन् ।

आर्थिक मन्दीको समयमा अटो शो नगर्नु भन्ने धेरैले भन्ने गरेको सुनाउँदै अध्यक्ष थापाले भने, ‘हामीले अटो शो गरेर अर्थतन्त्र चलायमान बनाउनुपर्छ भन्ने भयो । अटोमोबाइल क्षेत्रमा अर्थतन्त्र चलायमान बनाउन धेरै नै गतिविधिहरू समावेश हुन्छन् । लाखौँ करोडौं कारोबार हुने गर्छ । यो शोले अर्थतन्त्र चलायमान बनाउन मद्दत पुर्याउँछ भन्नेमा हामी ढुक्क छौं ।’ नाडा अटो शोमा सहभागी संस्था तथा अवलोकनकर्ताहरूको चाप बढ्दै गइरहेको छ । पहिलो दिनको बुकिङको संख्या हेर्दा पनि एकदमै राम्रो रहेको उनको भनाइ छ ।

आर्थिक मन्दीका कारण गाडीको व्यापार खुम्चिएको महिन्द्राका लागि नेपालको आधिकारिक वितरक अग्नि ग्रुप अन्तर्गतको अग्नी इन्कर्पोरेटमा सेल्स डिपार्ट हेर्ने विनोद बिडारी गुनासो गर्छन् । उनी भन्छन्, ‘आर्थिक मन्दीको असर एकदमै परेको छ । पहिलो हामीले एक महिनामै ३०/४० वटा गाडीहरू डेलिभरि गर्ने गर्थ्यौ । तर, १५/२० वटामा खुम्चिएर बस्नु परेको छ ।’

अटो शोमा भएको ग्राहकको उपस्थितले गाडीको व्यापारमा सकारात्मक लक्षण देखाएको हुण्डाईका लागि नेपालको आधिकारिक वितरक लक्ष्मी इन्टरकन्टिनेन्टल प्रालिका डिलरसिप हेड दिवाकर रेग्मी बताउँछन् । उनी भन्छन्, ‘अहिलेको हिसावमा हेर्ने हो भने सवारीको व्यापार केही कम भएको हो । तर, अटो शोमा भएको उपस्थितले राम्रो लक्षणहरू देखाएको छ । यसले हामीलाई आशा जगाएको छ ।’

गाडी खरिद गर्न चाहाने ग्राहकहरूलाई आर्थिक मन्दीले कुनै असर नगरेको पारामाउन्ड मोटर्सका डिलरसेल्स हेड विपुल चन्द्र भट्टराई बताउँछन् । उनले भने, ‘कोरोनाका कारण लामो समयदेखि नाडा अटो शो भइरहेको थिएन । तर, यस वर्षको शोमा सुरुको दिनदेखि नै बाक्लो उपस्थिति रहेको छ । इन्डष्ट्रीको साइज घटेको छ । जसले गाडी किन्न खोजिरहेको छ; उहाँहरूलाई आर्थिक मन्दीको असरले भने छोएको जस्तो देखिएको छैन । यसले गर्दा गाडी बिक्री गर्न सहज हुँदै जाने देखिएको छ ।’