अखबार नेपाल ट्रेन्डिङ

काठमाडौं: सत्तारुढ नेपाली कांग्रेसले आज संसदीय दलको बैठक बोलाएको छ । बैठक नयाँ बानेश्वरस्थित ल्होत्से हलमा दिउँसो साढे १२ बजे सुरु गर्ने तयारी गरेको छ ।

यसअघि कांग्रेस संसदीय दलको बैठक गत शुक्रबार बसेको थियो । बैठकमा सांसदहरूले आ-आफ्ना धारणा राखेका थिए । बैठकका एजेन्डामा पहिलेकै विषय नक्कली शैक्षिक प्रमाणपत्र लिएको आरोपमा पक्राउ परेर रिहा भएका सांसद सुनिल शर्मा लगायतका छन् ।

नक्कली सर्टिफिकेट प्रकरणमा गत बिहीबार पक्राउ परेका सांसद शर्मा जिल्ला अदालत काठमाडौंको आदेशमा शुक्रबार साँझ रिहा भइसकेका छन् ।

कांग्रेस संसदीय दलको बैठकका अन्य एजेन्डामा संसद्‌मा विचाराधीन र प्रस्तुत हुनुपर्ने आवश्यक विधेयक, आव २०८०/८१ को बजेटको प्रभावकारी कार्यान्वयन र संसद्मा पार्टी (कांग्रेस) को प्रभावकारी भूमिका छन् ।

यस्तै बाढी, पहिरोपीडितलाई राहत, उद्धर तथा पुनःस्थापना, पशु चौपायामा फैलिएको लम्पी स्किन रोग रोकथाम र किसानलाई राहत, डेंगी, आँखा पाक्ने रोगको रोकथाम र उपचारका सम्बन्धमा सरकारलाई अनुरोध गर्ने विषयमा पनि कांग्रेस संसदीय दलमा छलफल भइरहेको जनाइएको छ । यिनै विषयमा सांसदहरूले धारणा राखिरहेका छन् ।