अखबार नेपाल ट्रेन्डिङ

काठमाडौं: नेप्सेमा सूचिकृत २० वटा वाणिज्य बैंकहरूको आर्थिक वर्ष २०७९/८० को वित्तीय रिपोर्ट सार्वजनिक भएको छ ।

गत असार मसान्तसम्म बैंकहरूले गरेको वित्तीय कारोबार निक्षेप सङ्कलन, कर्जा लगानी र विविध कारोबारबाट प्राप्त प्रतिफलका आधारमा आर्थिक वर्षभित्र बैंकहरूले कूल ७० अर्ब १७ करोड ५८ लाख १२ हजार रुपैयाँ खुद नाफा कमाएका छन् ।

अघिल्लो आर्थिक वर्षको तुलनामा बैंकहरूले यो वर्ष २४.९३ प्रतिशतको नाफा वृद्धि गरेका हुन् । आर्थिक वर्ष २०७८/७९ मा बैंकहरूले कूल ५६ अर्ब १७ करोड २३ लाख ५६ हजार रुपैयाँ नाफा कमाएका थिए ।

दुई ठुला बैंक ‘नबिल’ र ‘ग्लोबल आईएमई’ बीच प्रतिस्पर्धा देखिएको छ । आर्थिक वर्षको अन्तसम्ममा ७ अर्ब ५२ करोड ७१ लाख रुपैयाँ बढी नाफा कमाएर शीर्ष स्थानमा रहन सफल नबिल बैंकलाई ग्लोबल आईएमई बैंकले पच्छ्याइरहेको छ । समीक्षा अवधिमा ग्लोबल आईएमई बैंकले ७ अर्ब २५ करोड ३४ लाख ५५ हजार रुपैयाँ खुद नाफा आर्जन गरेको छ ।

गत वर्ष ४ अर्ब ९५ करोड ९२ लाख २५ हजार रुपैयाँ नाफा कमाएको ग्लोबल आईएमई बैंकलाई यस वर्ष नबिल बैंकले ७६.८६ प्रतिशत अर्थात् ३ अर्ब २७ करोड ११ लाख २५ हजार रुपैयाँले नाफा वृद्धि गर्दै ग्लोबल आईएमई बैंकलाई उछिनेको हो । आर्थिक वर्ष २०७८/७९ मा नबिल बैंकले जम्मा ४ अर्ब २५ करोड ६० लाख २४ हजार रुपैयाँ नाफा कमाएको थियो ।

यस्तै, यस वर्ष पनि आफ्नो तेस्रो र चौथो स्थान कायम गर्दै राष्ट्रिय वाणिज्य बैंक र एनआईसी एशिया बैंकले क्रमशः ४ अर्ब ९१ करोड ७१ लाख ९९ हजार रुपैयाँ र ४ अर्ब ६५ करोड १३ लाख ३८ हजार रुपैयाँ नाफा कमाएका छन् । अघिल्लो आर्थिक वर्ष वाणिज्य बैंकले ४ अर्ब २९ करोड २८ लाख रुपैयाँ नाफा कमाउँदा एनआईसी एशिया बैंकले ४ अर्ब २१ करोड ४९ लाख रुपैयाँ खुद नाफा कमाएको थियो । अघिल्लो वर्षको तुलनामा बैंकहरूले क्रमशः १४.५४ प्रतिशत र १०.३५ प्रतिशतले नाफा वृद्धि गरेका हुन् ।

नेपाल इन्भेष्टमेन्ट बैंक: बैंकले आर्थिक वर्ष २०७९/८० मा ४ अर्ब २९ करोड ६६ लाख २२ हजार रुपैयाँ खुद नाफा कमाएको छ । अघिल्लो वर्ष ३ अर्ब ७९ करोड ७६ लाख ४ हजार रुपैयाँ नाफा कमाएको बैंकले यो वर्ष १३.१४ प्रतिशतले नाफा बढाएको हो ।

स्ट्यान्डर्ड चार्टर्ड बैंक: यो वर्ष स्ट्यान्डर्ड चार्टर्ड बैंकले ५६.२७ प्रतिशतले नाफामा वृद्धि गरेको छ । अघिल्लो वर्ष जम्मा २ अर्ब २५ करोड ५९ लाख रुपैयाँ बराबरको मात्र नाफा आर्जन गरेको बैंकले यो वर्ष ३ अर्ब ५२ करोड ५४ लाख रुपैयाँ नाफा कमाउन सफल भएको छ ।

यस्तै, नेपाल बैंक, एनएमबी, एभरेस्ट, हिमालयन, सिद्धार्थ, कृषि विकास, प्रभु, सानिमा, लक्ष्मी–सनराइज, नेपाल एसबीआई, सिटिजन्स् र माछापुच्छ्रे बैंकले अघिल्लो वर्षको तुलनामा आकर्षक नाफा वृद्धि गर्दै १ अर्ब ८५ करोड रुपैयाँदेखि ३ अर्ब ४१ करोड रुपैयाँसम्म नाफा कमाएका छन् ।

१८ वटा वाणिज्य बैङ्कहरूले खराब आर्थिक स्थितिका बाबजुद पनि आकर्षक नाफा वृद्धि गर्दै गर्दा यता दुईवटा बैंकको नाफामा भने ब्रेक लाग्न पुगेको छ । सार्वजनिक तथ्याङ्क अनुसार अघिल्लो वर्षभन्दा पनि कम नाफा कमाउनेमा प्राइम कमर्सियल बैंक र कुमारी बैंक रहेका छन् । बैङ्कहरूले क्रमशः १८.८१ प्रतिशत र २४.१४ प्रतिशतले नाफा गुमाएका छन् ।

अघिल्लो वर्ष नै २ अर्ब ७८ करोड ७३ लाख रुपैयाँ नाफा कमाइसकेको प्राइम कमर्सियल बैंकले यो वर्ष २ अर्ब २६ करोड ३१ लाख रुपैयाँ मात्र नाफा कमाएको छ भने २ अर्ब ५७ करोड ९८ लाख रुपैयाँ नाफा कमाएको कुमारी बैंकले यो वर्ष १ अर्ब ९५ करोड ७१ लाख रुपैयाँ नाफा कमाएको छ ।

तथापि, २० वटा वाणिज्य बैंकहरुमध्ये सबैभन्दा पुच्छरमा रहेर माछापुच्छ्रे बैंकले जम्मा १ अर्ब ८५ करोड ११ लाख ५६ हजार रुपैयाँ मात्र नाफा कमाएको छ । अघिल्लो वर्ष १ अर्ब ६८ करोड ६६ लाख ५५ हजार रुपैयाँ नाफा कमाएको बैंकले यो वर्ष ९.७५ प्रतिशतले नाफामा वृद्धि गरेको हो ।